Shtatë punonjës amerikanë të angazhuar në përballimin e shpërthimit të Ebolës në Republikën Demokratike të Kongos janë futur në karantinë në një strukturë të re izolimi në Kenia, pas kufizimeve të reja të udhëtimit të vendosura nga qeveria amerikane.
Këta janë personat e parë që po qëndrojnë në këtë objekt izolimi, i cili ka shkaktuar kundërshtime të mëdha në Kenia dhe është bërë pjesë e një beteje ligjore, pasi një gjykatë ka urdhëruar pezullimin e punimeve për ndërtimin e tij.
Sipas politikës së re të Uashingtonit, qytetarët amerikanë që kthehen nga Republika Demokratike e Kongos, ku vazhdon një shpërthim i Ebolës, duhet të qëndrojnë për tre javë në një vend të tretë para se të lejohen të hyjnë në Shtetet e Bashkuara.
Për këtë qëllim, qeveria amerikane ka ndërtuar një njësi izolimi me 50 shtretër në një bazë ajrore në Kenian qendrore, e cila do të përdoret për amerikanët e ekspozuar ndaj virusit në Republikën Demokratike të Kongos ose Ugandë.
Vendimi ka ngjallur reagime në mesin e shumë qytetarëve kenianë, të cilët kanë shprehur shqetësim për rrezikun e mundshëm shëndetësor që mund të paraqesin personat e ekspozuar ndaj virusit.
Muajin e kaluar, ministri i Shëndetësisë i Kenias kishte urdhëruar ndalimin e menjëhershëm të ndërtimit të objektit, pasi u shpall fajtor për shpërfillje të gjykatës për mosrespektimin e një urdhri që kërkonte ndërprerjen e punimeve deri në marrjen e një vendimi përfundimtar.
Një zyrtar i Departamentit amerikan të Shtetit tha për Reuters se një grup amerikanësh, të cilët kishin shërbyer në vijën e parë të reagimit ndaj Ebolës, ishin “lëvizur vullnetarisht në qendrën e Kenias për monitorim paraprak dhe izolim”.
“Autoritetet keniane kanë autorizuar lëvizjen e tyre në objekt nën vëzhgimin e mjekëve të shërbimit shëndetësor publik të SHBA-së”, tha zyrtari, duke shtuar se vendimi u mor “strikt nga një masë e madhe kujdesi”.
Sipas autoriteteve amerikane, masa është ndërmarrë si një hap parandalues për monitorimin e personave që mund të jenë ekspozuar ndaj virusit, ndërsa deri tani nuk është raportuar se ndonjëri prej tyre është diagnostikuar me Ebola. Sinjali – aty ku e vërteta flet para lajmit!