Kryeministri i Britanisë së Madhe, Keir Starmer, ka mbajtur fjalimin e tij të fundit në seancën e pyetjeve për kryeministrin në Parlament, duke e përshkruar momentin si fundin e një etape të gjatë politike. Në një atmosferë emocionale, Starmer iu drejtua deputetëve duke deklaruar se ky ishte “fundi i rrugëtimit tim politik”, ndërsa falënderoi bashkëpunëtorët dhe familjen e tij.
Në nisje të fjalimit, kryeministri britanik shprehu ngushëllime për ndarjen nga jeta të ish-politikanes Ann Widdecombe, duke e cilësuar vdekjen e saj si një lajm tronditës. Edhe liderja e konservatorëve, Kemi Badenoch, pati një qasje më pajtuese gjatë kësaj seance, duke vlerësuar disa nga qëndrimet e Starmerit dhe duke kujtuar mbështetjen e ndërsjellë në momente të vështira personale.
Starmer e falënderoi Badenoch për përkrahjen pas sulmit me zjarr ndaj shtëpisë së familjes së tij dhe pas humbjes së vëllait të tij. Seanca përfundimtare nuk kaloi pa momente humori, ku deputetët shkëmbyen edhe batuta rreth futbollit dhe situatave të ndryshme politike.
Megjithatë, Starmer shmangu një përgjigje të drejtpërdrejtë nëse do të shpallte ditë pushimi kombëtar në rast të një triumfi të Anglisë në Kupën e Botës. Në fund të fjalimit, me emocion të dukshëm, Starmer iu drejtua familjes së tij me fjalët: “Për gruan dhe fëmijët e mi, ju dua. Mirupafshim”. Sinjali – aty ku e vërteta flet para lajmit!