Një ngjarje tragjike ka ndodhur në ishullin Tenerife të Spanjës, ku një 88-vjeçar britanik ka ndërruar jetë pasi u sulmua gjatë një grabitjeje, teksa përpiqej të mbronte bashkëshorten e tij. Ray Cowen, me origjinë nga Blackpool, reagoi kur grabitësit i rrëmbyen çantën gruas së tij, Judy, 79 vjeç, dhe tentuan t’i merrnin edhe orën.
Gjatë përballjes, ai u shty me forcë drejt një automjeti të parkuar, duke pësuar lëndime të rënda në kokë. Ekipet e emergjencës ndërhynë menjëherë dhe arritën ta rikthenin në jetë në vendngjarje, ndërsa më pas ai u transportua në spital. Megjithatë, pavarësisht përpjekjeve të mjekëve, 88-vjeçari ndërroi jetë dy ditë pas incidentit.
Ngjarja kishte ndodhur më 17 qershor, vetëm pak ditë pasi Cowen kishte festuar ditëlindjen e tij të 88-të në një lokal pranë vendit ku po kalonte pushimet. Autoritetet spanjolle kanë arrestuar tre persona në lidhje me rastin.
I dyshuari kryesor, i cili besohet se i shkaktoi lëndimet fatale pensionistit, është lënë në paraburgim me urdhër të gjykatës, ndërsa dy të dyshuarit e tjerë janë liruar me kusht deri në vazhdimin e procedurave. Hetimet për zbardhjen e plotë të rrethanave të ngjarjes janë ende në zhvillim. Sinjali – aty ku e vërteta flet para lajmit!