Anglia është vetëm një hap larg finales së Kupës së Botës 2026, por jo të gjithë lojtarët e Thomas Tuchel kanë pasur mundësinë të kontribuojnë në fushë. Para gjysmëfinales së madhe ndaj Argjentinës, tre futbollistë të “Tre Luanëve” nuk kanë zhvilluar ende asnjë minutë në këtë Botëror. Bëhet fjalë për Trevoh Chalobah, Ivan Toney dhe Kobbie Mainoo.
Tuchel ka ruajtur pothuajse të njëjtin formacion që nga fitorja 4-2 ndaj Kroacisë në ndeshjen hapëse, duke bërë shumë pak ndryshime gjatë turneut. Kjo ka bërë që disa lojtarë të mbeten jashtë planeve të trajnerit. Chalobah u thirr në skuadër si zëvendësues i minutës së fundit për Tino Livramenton, por ende nuk ka marrë rastin të debutojë në Botëror.
Edhe Ivan Toney nuk ka gjetur hapësira, pasi Harry Kane ka qenë zgjedhja e padiskutueshme në sulm dhe vetëm një dëmtim i kapitenit anglez mund t’i hapte rrugën sulmuesit për të luajtur. Ndërkohë, Kobbie Mainoo është përballur me konkurrencë të fortë në mesfushë, ku Morgan Rogers, Declan Rice, Jude Bellingham dhe Elliot Anderson kanë qenë zgjedhjet kryesore të Tuchel.
Mbetet të shihet nëse trajneri gjerman do t’u japë një mundësi ndonjërit prej tyre në gjysmëfinalen kundër Argjentinës ose në ndeshjen e fundit të turneut, qoftë finalja apo sfida për vendin e tretë.