Wayne Rooney dhe Ricardo Quaresma kanë drejtuar kritika të ashpra ndaj mesfushës së Portugalisë, pas eliminimit të dhimbshëm nga Kupa e Botës. Në qendër të kritikave ishin Bruno Fernandes, Vitinha dhe Joao Neves, të cilët nuk arritën ta furnizonin Cristiano Ronaldon në mënyrën e duhur gjatë turneut.
E cilësuar para Botërorit si një nga mesfushat më të mira në botë, treshja e artë e Portugalisë zhgënjeu në momentin vendimtar. Pavarësisht talentit të madh në mesfushë, Portugalia u eliminua në fazën e 1/8 së finales pas humbjes 1-0 ndaj Spanjës, shumë larg ambicieve për ta fituar trofeun.
Para turneut, vëmendja kryesore ishte te Cristiano Ronaldo dhe te mënyra se si sulmuesi 41-vjeçar do të performonte me një mesfushë kaq cilësore pas vetes. Por, në fund, Portugalia nuk arriti ta shfrytëzonte siç duhet kapitenin e saj. Pas eliminimit, Ronaldo konfirmoi se ky ishte Botërori i tij i fundit.
“Është e vërtetë, ky ishte Botërori im i fundit”, kishte deklaruar ai para ndeshjes, duke konfirmuar lajmin që më herët ishte përmendur edhe nga motra e tij gjatë turneut. “Do të ketë kohë për të menduar për gjithçka tjetër, për të qenë me familjen time dhe nuk dua të marr vendime në nxehtësi e sipër. Jeta vazhdon”, shtoi Ronaldo.
Pas ndeshjes, ai foli sërish me krenari për rrugëtimin e tij me Portugalinë. “Kam fituar tre tituj me Portugalinë. Para Cristianos, Portugalia nuk kishte fituar asnjë titull në histori. Kam fituar Euro 2016, që për mua është si të fitosh një Kupë Bote. Largohem me ndërgjegje të pastër dhe duke ditur se dhashë më të mirën time për Portugalinë”, tha ai.
Ronaldo arriti ta thyejë më në fund pritjen 20-vjeçare për të shënuar në fazën me eliminim direkt të një Botërori, por statistikat e publikuara pas ndeshjes ndaj Spanjës treguan se ai kishte pasur shumë pak furnizim nga bashkëlojtarët.
Mesfusha e Portugalisë nën kritika pas statistikave zhgënjyese Me një nga golashënuesit më të mëdhenj në histori në majë të sulmit, Portugalia pritej të krijonte më shumë për Ronaldon. Megjithatë, statistikat pas eliminimit zbuluan se Joao Neves dhe Vitinha nuk krijuan asnjë rast të vetëm gjatë gjithë turneut.
Së bashku me Bruno Fernandesin, treshja e mesfushës nuk regjistroi asnjë asist, ndërsa Portugalia shënoi tetë gola në Botëror para se të largohej nga gara.
Duke folur në transmetimin e BBC-së, Wayne Rooney kritikoi veçanërisht Bruno Fernandesin, duke thënë se ai kishte humbur disa mundësi për ta dërguar topin në zonë për Ronaldon dhe nuk kishte luajtur sipas pikave më të forta të kapitenit portugez. “Nëse luan me Cristiano Ronaldon, duhet ta përdorësh atë”, tha Rooney.
“Topi mund të ishte futur në zonë nga Bruno Fernandes në disa raste, por ata refuzuan ta bënin këtë. Nëse e aktivizon Ronaldon, duhet ta shfrytëzosh. Në goditjet standarde, ai është ende një kërcënim i madh për Portugalinë. Mos ia jep topin 30 metra larg portës, sepse kjo nuk është më pika e tij më e fortë.
Dërgoja topin në zonën e rreptësisë, aty ku ai është ende efektiv”, shtoi ish-sulmuesi i Anglisë. Me një qëndrim të ngjashëm doli edhe ish-ylli portugez Ricardo Quaresma, i cili foli hapur në një intervistë pas ndeshjes me Ruben Dias. “Në mesfushë kemi lojtarë të mëdhenj, shumë talent, por në këtë Botëror ishin shumë, shumë të dobët.
Sulmi ishte i njëjtë, ndërsa mbrojtja ishte e humbur”, tha Quaresma. Ai nuk kurseu as kritikat ndaj trajnerit Roberto Martinez. “Roberto Martinez nuk më ka dhënë kurrë besim. Ne duhet ta luajmë këtë lojë me shumë më tepër kënaqësi. U eliminuam nga turneu me kombëtaren që të gjithë e quanin ‘skuadra më e mirë në histori’” , shtoi ai.
Më herët, Thierry Henry kishte veçuar Ronaldon si një nga problemet e Portugalisë, por pas statistikave dhe analizave të fundit, duket qartë se problemi ishte më i ndërlikuar. Ronaldo nuk ishte vetëm në qendër të debatit; ai ishte edhe viktimë e një sistemi që nuk arriti ta furnizonte siç duhet në momentet më të rëndësishme.
Kështu, një nga karrierat më të mëdha ndërkombëtare në historinë e futbollit përfundon me shumë trishtim, me Ronaldon që largohet nga Botërori pa trofeun që e kërkoi deri në fund.