Dogana e Kosovës ka njoftuar se më , gjatë kontrolleve rutinore në pikën e kalimit kufitar në Han të Elezit ka zbuluar mall komercial dhe mjete monetare të padeklaruara.
Siç bëhet e ditur, zyrtarët doganorë kanë ndaluar një automjet me targa të Maqedonisë së Veriut dhe gjatë intervistimit fillestar, drejtuesi i automjetit ka deklaruar se nuk posedon asnjë mall apo mjet monetar për deklarim. Por pas kontrollit fizik të automjetit është konstatuar një sasi malli me natyrë komerciale, e cila nuk ishte deklaruar pranë autoriteteve doganore.
Po ashtu, gjatë kontrollit pasagjerit dhe drejtuesit të automjetit i janë gjetur 29,900 euro para të gatshme, të cilat nuk ishin deklaruar poashtu.
Siç njofton Dogana, malli i padeklaruar, mjetet monetare dhe automjeti janë sekuestruar për procedura të mëtejme, ndërsa ndaj palëve të përfshira, thuhet se do të ndërmerren masat e parapara, përfshirë konfiskimin e përqindjes së mjeteve monetare sipas vendimit të autoritetit kompetent dhe procedurat për kundërvajtje doganore.
Lidhur me këtë, autoritetet kanë njoftuar se çdo person ka detyrim ligjor të deklarojë mallrat që i nënshtrohen procedurave doganore, ndërsa mosdeklarimi përbën kundërvajtje doganore dhe i nënshtrohet masave administrative dhe ndëshkuese të parapara me ligj.
Gjithashtu, nga Dogana e Kosovës përkujtuan se bazuar në legjislacionin në fuqi për kontrollin e transportit ndërkufitar të parave të gatshme, çdo person që hyn ose del nga Republika e Kosovës me 10,000 euro ose më shumë, është i obliguar t’i deklarojë ato tek autoritetet doganore.
“Mosdeklarimi i mjeteve monetare përbën shkelje ligjore dhe sjell masa administrative, përfshirë konfiskimin e përkohshëm të mjeteve monetare dhe zhvillimin e procedurave përkatëse.” – thuhet në njoftimin e Doganës më .