Autoritetet kineze kanë ngritur nivelin më të lartë të alarmit për tajfunin Maysak, i cili ka sjellë reshje të dendura shiu dhe përmbytje të mëdha në rajonin jugor të Guangxi-t. Deri tani raportohen dy viktima, ndërsa rreth 48 mijë persona janë evakuuar nga zonat e rrezikuara.
Sipas autoriteteve lokale, shirat e rrëmbyeshëm shkaktuan shembjen e disa digave në qytetin Nanning, kryeqytetin e Guangxi-t. Rrëshqitje balte u shkaktuan pas çarjes së një dige në Rezervuarin Liulan, ndërsa një tjetër digë në Rezervuarin Yunbiao u shemb. Po ashtu, Rezervuari Liugang doli nga shtrati, duke përkeqësuar situatën në zonat përreth.
Në qytetin Fangchenggang, mbi 800 banorë u detyruan të largoheshin nga banesat e tyre për shkak të përmbytjeve. Ndërkohë, niveli i ujit ka tejkaluar kufijtë e alarmit në 66 stacione hidrologjike përgjatë 55 lumenjve në Guangxi. Sipas të dhënave zyrtare, në zonën e Luwei ranë 637 milimetra reshje brenda vetëm 24 orëve, duke shkaktuar përmbytje të menjëhershme dhe dëme të konsiderueshme.
Megjithëse Maysak është dobësuar në një stuhi pasi preku territorin kinez, autoritetet paralajmërojnë se reshjet intensive pritet të vazhdojnë në Guangxi dhe në pjesën më të madhe të Kinës jugore edhe gjatë ditëve në vijim.
Për përballimin e situatës, autoritetet kanë angazhuar 1,372 ekipe shtesë shpëtimi dhe 140 mjete lundruese për të ndihmuar operacionet e evakuimit dhe të ndihmës për banorët e prekur.