Wayne Rooney ka bërë një premtim qesharak para përballjes mes Brazilit dhe Norvegjisë në fazën e 1/8 së finales së Kupës së Botës, ndoshta pa e ditur rekordin historik mes dy kombëtareve. Norvegjia siguroi fitoren e parë në histori në fazën me eliminim direkt të Botërorit, pasi mposhti Bregun e Fildishtë me rezultat 2-1.
Në anën tjetër, Brazili kaloi Japoninë me të njëjtin rezultat, duke vendosur përballjen me norvegjezët. Brazili shihet si favorit për këtë sfidë, por Norvegjia ka lojtarë të rrezikshëm që mund t’i shkaktojnë probleme pesë herë kampionëve të botës. Erling Haaland e tregoi sërish peshën e tij, duke shënuar golin e fitores ndaj Bregut të Fildishtë.
Megjithatë, Rooney nuk beson se Norvegjia ka shumë gjasa të kalojë në çerekfinale përballë një kundërshtari si Brazili. Duke folur për BBC, ai tha: “Nëse Norvegjia arrin në çerekfinale, do të shkoj te lumi Mersey dhe do ta përshkoj me varkë.” Deklarata erdhi pasi Gabby Logan përmendi mundësinë që, nëse Norvegjia mposht Brazilin, mund të përballet me Anglinë në çerekfinale.
Për këtë skenar, Anglia fillimisht duhet të kalojë Republikën Demokratike të Kongos në 1/16 e finales dhe më pas fituesin e çiftit Meksikë – Ekuador në fazën e 1/8 së finales. Ajo që e bën deklaratën e Rooneyt edhe më interesante është fakti se Norvegjia nuk ka humbur kurrë ndaj Brazilit.
Norvegjezët fituan ndeshjen e vetme zyrtare mes dy kombëtareve në Kupën e Botës 1998 në Marseille, me rezultat 2-1. Ata gjithashtu kishin mposhtur Brazilin 4-2 në një miqësore në vitin 1997. Përballja e parë mes tyre, në korrik 1988, përfundoi në barazim, ashtu si edhe ndeshja e fundit e luajtur mes dy skuadrave në gusht 2006.