Emisari i Bashkimit Evropian për dialogun Kosovë–Serbi, Peter Sorensen, ka deklaruar se Marrëveshja e Ohrit për normalizimin e marrëdhënieve mes dy vendeve është një zotim ndërkombëtar dhe jo një dokument i zakonshëm traktati.
Duke folur në Forumin e Dubrovnikut, Sorensen tha se marrëveshja ka nisur të zbatohet në disa pjesë, duke përmendur si shembull çështjen e personave të zhdukur, ndërsa theksoi se disa elemente të tjera ende mbeten të paimplementuara.
Ai shtoi se Bashkimi Evropian pret respektimin e plotë të marrëveshjes dhe se, sipas konsultimeve të tij me ekspertë juridikë në Bruksel dhe New York, statusi i saj nuk vihet në pikëpyetje.
Sorensen gjithashtu iu referua praktikës ndërkombëtare, duke thënë se një marrëveshje mund të jetë e vlefshme edhe pa nënshkrim formal, për sa kohë që është arritur mes palëve në prani të ndërmjetësuesve ndërkombëtarë.
Sipas tij, BE-ja e ka mbështetur vazhdimisht këtë marrëveshje në konkluzionet e saj zyrtare, ndërsa zbatimi i saj mbetet pjesë e procesit të dialogut që po vazhdon mes Kosovës dhe Serbisë. Sinjali – aty ku e vërteta flet para lajmit!