Presidenti i Shteteve të Bashkuara të Amerikës, Donald Trump, ka deklaruar se është i gatshëm të takohet me presidentin rus, Vladimir Putin, dhe liderin kinez, Xi Jinping, në Kinë muajin e ardhshëm. Ndërkohë, ai ka përsëritur kritikat ndaj presidentit ukrainas, Volodymyr Zelensky, duke thënë se është koha që dikush tjetër të negociojë në emër të Ukrainës.
Trump konfirmoi të hënën se do të ishte i gatshëm të ulej në një tryezë me dy liderët, në një takim të mundshëm në kuadër të samitit të Bashkëpunimit Ekonomik Azi-Paqësor (APEC), i cili do të mbahet më 18 dhe 19 nëntor në qytetin kinez Shenzhen, shkruan Euornews, transmeton “Bota sot”.
Sipas presidentit amerikan, tema kryesore e një takimi të tillë do të ishte çarmatimi bërthamor, por diskutimet mund të përfshijnë edhe luftën në Ukrainë. I pyetur nga gazetarët nëse do të takohej me Putinin dhe Xi Jinpingun për të diskutuar konfliktin në Ukrainë, Trump tha se kjo nuk do të ishte arsyeja kryesore e takimit.
“Do ta bëja, por jo aq shumë për Ukrainën, sepse Rusia, sinqerisht, ka qenë në rregull me Ukrainën. Nuk kanë bërë shumë ”, deklaroi Trump. Ai shtoi se takimi do të shërbente kryesisht për të diskutuar armët bërthamore dhe çarmatimin.
Megjithatë, i pyetur nëse çështja e Ukrainës do të shtrohej gjatë bisedimeve me dy liderët, presidenti amerikan u përgjigj se do të bënte gjithçka që ishte e mundur për t’i dhënë fund luftës.
Moska konfirmon diskutimet, Pekini thotë se nuk ka informacione Zëdhënësi i Kremlinit, Dmitry Peskov, deklaroi më herët se mundësia e një takimi të tillë ishte përmendur, duke pasur parasysh se të tre liderët mund të marrin pjesë në samitin në Kinë. “Duke qenë se të tre krerët e shteteve mund të marrin pjesë në një samit në Kinë, tema e një takimi të mundshëm është përmendur ”, tha Peskov.
Megjithatë, ai theksoi se deri më tani nuk janë paraqitur apo diskutuar propozime konkrete dhe as marrëveshje për organizimin e takimit ose për agjendën e tij. Nga ana tjetër, zëdhënësja e Ministrisë së Jashtme kineze, Mao Ning, deklaroi se nuk kishte informacione për një takim të mundshëm mes Trumpit, Putinit dhe Xi Jinpingut.
Samiti i APEC-ut do të mbahet më 18 dhe 19 nëntor në Shenzhen, ku pritet të marrin pjesë përfaqësues të ekonomive anëtare, përfshirë Shtetet e Bashkuara, Kinën dhe Rusinë.
Ukraina kundërshton një takim pa pjesëmarrjen e saj Propozimi për një takim të mundshëm mes tre liderëve ka shkaktuar reagime në Kiev, ku autoritetet ukrainase insistojnë se nuk mund të merren vendime për të ardhmen e vendit pa përfshirjen e Ukrainës.
Ministri i Jashtëm ukrainas, Andriy Sybiha, kundërshtoi mundësinë e një takimi ku do të diskutohej lufta pa praninë e përfaqësuesve ukrainas. “Një takim trepalësh mes liderëve të Rusisë, Kinës dhe Shteteve të Bashkuara do të prodhonte efektin e kundërt: do ta inkurajonte Putinin ta vazhdonte këtë luftë”, deklaroi Sybiha.
Në një reagim në rrjetet sociale, ai e cilësoi Putinin si kriminel lufte dhe tha se presidenti rus nuk është lider global. Ndërkohë, Peskov theksoi se një marrëveshje përfundimtare nuk mund të arrihet pa pjesëmarrjen e një përfaqësuesi të Ukrainës, i cili të jetë i gatshëm të marrë përgjegjësinë për të.
Megjithatë, Putini ka përjashtuar vazhdimisht mundësinë e një takimi me Zelenskyn përpara se të përgatitet një marrëveshje përfundimtare paqeje. Ai gjithashtu ka vënë në pikëpyetje autoritetin e presidentit ukrainas për të nënshkruar një marrëveshje, pasi mandati i tij pesëvjeçar ka përfunduar gjatë periudhës së ligjit ushtarak.
Trump sulmon sërish Zelenskyn: Është koha që dikush tjetër të negociojë Presidenti amerikan i ka shtuar kritikat ndaj homologut të tij ukrainas gjatë ditëve të fundit, ndërsa të hënën deklaroi hapur se Ukraina duhet të ketë një tjetër negociator. “Zelensky nuk e di se për çfarë po flet”, tha Trump, kur u pyet për komentet e presidentit ukrainas.
“Të jem i sinqertë, mendoj se është koha që dikush tjetër të negociojë në emër të Ukrainës”, shtoi ai. Deklaratat e fundit të Trumpit vijnë në një kohë kur përpjekjet diplomatike për t’i dhënë fund luftës në Ukrainë vazhdojnë të përballen me dallime të thella mes Moskës dhe Kievit.
Një takim i mundshëm mes Trumpit, Putinit dhe Xi Jinpingut mund të krijojë një tjetër mundësi për diskutime mbi sigurinë ndërkombëtare dhe çështjen bërthamore, por mbetet e paqartë nëse lufta në Ukrainë do të jetë pjesë e agjendës dhe nëse Kievi do të përfshihet në ndonjë proces të tillë.