Një skandal i dyshuar për pagesa në këmbim të ndikimit politik ka shkaktuar përplasje mes aleatëve të presidentit amerikan, Donald Trump, ndërsa ky i fundit ka urdhëruar hetimin e rastit, raporton Axios.
Në qendër të çështjes është Richard Grenell, ish-drejtues i Qendrës Kennedy dhe aktualisht i dërguar special presidencial, i cili dyshohet se i ka kërkuar biznesmenit turk, Turhan Mildon, të transferojë rreth 17 milionë dollarë përmes kompanisë Texas Armament & Technology, me seli në Hjuston.
Sipas raportimit, rreth 6 milionë dollarë nga kjo shumë ishin paraparë si donacion për Qendrën Kennedy, institucion i njohur i arteve performuese në Uashington. Në një mesazh që i atribuohet Grenellit, thuhet se ai i kishte premtuar biznesmenit qasje në aktivitete me pjesëmarrjen e personave të rëndësishëm dhe afërsi me administratën amerikane.
“Sapo paratë të vijnë tek kompania këtu, unë do të organizoj donacionin për Qendrën Kennedy dhe ju do të bashkoheni në eventet VIP dhe do të afroheni me administratën, madje edhe me presidentin e SHBA-së”, thuhet në mesazhin e raportuar nga mediat.
Megjithatë, Alina Habba, bashkëshortja e Mildonit dhe ish-prokurore federale në New Jersey, ka pretenduar se Qendra Kennedy nuk e ka marrë kurrë donacionin e paraparë. Grenell i ka mohuar akuzat, duke deklaruar se nuk e ka dërguar mesazhin në fjalë dhe duke i cilësuar pretendimet ndaj tij si të pavërteta.
Ndërkohë, sipas raportimit, Trump ka urdhëruar një hetim për të përcaktuar nëse ndonjë prej aleatëve të tij ka përvetësuar donacionin e destinuar për Qendrën Kennedy. Sinjali – aty ku e vërteta flet para lajmit!