Kancelari gjerman Friedrich Merz kërkon zbatimin e reformave dhe një profil më të qartë politik për CDU-në. Në kongresin e Unionit të të Rinjve në Bon, ai kundërshtoi bashkëpunimin me AfD-në dhe kritikoi afrimin e SPD-së dhe të Gjelbërve me të Majtën.
Kancelari gjerman Friedrich Merz ka dërguar një mesazh të qartë për partnerët e tij në koalicionin qeverisës, duke theksuar se suksesi i qeverisë nuk mund të arrihet duke hequr dorë nga objektivat kryesore politike.
Duke folur në kongresin e Unionit të të Rinjve të CDU-së (Junge Union), në Bon, Merz mbrojti kursin reformues të qeverisë dhe kërkoi që partia e tij të dallojë më qartë profilin politik nga ai i partnerit të koalicionit, Partisë Socialdemokrate (SPD). “Dua që ky koalicion të jetë i suksesshëm”, deklaroi Merz, duke shtuar se kjo nuk mund të bëhet me çdo kusht.
“Edhe për mua ka kufij”, theksoi ai. Kancelari kërkoi gjithashtu që të jetë e qartë se CDU-ja është partneri më i madh në koalicion, duke sinjalizuar se nuk është i gatshëm të bëjë kompromise që, sipas tij, do ta zbehnin identitetin politik të partisë.
Merz kundër bashkëpunimit me AfD-në dhe të Majtën Në fjalimin e tij, Merz u distancua nga mundësia e bashkëpunimit me Alternativën për Gjermaninë (AfD), parti e së djathtës ekstreme, duke iu referuar zhvillimeve politike në Saksoni-Anhalt. Ai paralajmëroi se anëtarët e CDU-së që mbështesin zgjedhjen e përfaqësuesve të AfD-së në poste shtetërore nuk kanë vend në partinë e tij.
Deklarata erdhi pas dyshimeve se deputetë të CDU-së mund të kenë votuar për kandidatin e AfD-së për kryetar të parlamentit rajonal në Saksoni-Anhalt. Në të njëjtën kohë, Merz kritikoi SPD-në dhe të Gjelbrit për afrimin e mundshëm me të Majtën në Berlin, duke kundërshtuar formimin e një qeverie të udhëhequr nga kjo forcë politike.
“Kush dëshiron të forcojë qendrën politike, nuk duhet të zhvillojë bisedime me radikalët e majtë”, deklaroi kancelari, duke kërkuar që kjo qasje të ndërpritet. Ai përsëriti gjithashtu mbështetjen e CDU-së për të drejtën e Izraelit për të ekzistuar dhe theksoi se antisemitizmi nuk ka vend në Gjermani.
Friedrich Merz Reforma e pensioneve, një nga përplasjet kryesore Një pjesë e rëndësishme e fjalimit të Merzit iu kushtua reformave ekonomike dhe sociale, veçanërisht sistemit të pensioneve. Kancelari kërkoi që qeveria federale të marrë vendime për reformën brenda këtij viti dhe që rekomandimet e komisionit përkatës të zbatohen plotësisht.
Një nga propozimet që ka shkaktuar debat parashikon heqjen e mundësisë së pensionimit pa penalizime financiare pas 45 vitesh kontribute. Kjo ide kundërshtohet prej kohësh nga SPD-ja, ndërsa edhe tre kryeministra të CDU-së janë shprehur kundër saj.
Merz pranoi se reformat sjellin debate dhe tensione politike, por argumentoi se ato janë të nevojshme përpara se vendi të mund të rikthehet në një gjendje më të qetë. “Reformat shoqërohen gjithmonë me debate dhe polemika. Ato e trazojnë vendin dhe edhe partinë tonë. Vetëm pasi të përfundojnë këto reforma mund të rikthehet qetësia”, deklaroi ai.
Të rinjtë patën shumë kritika ndaj qeverisë federale Merz kërkon më shumë përgjegjësi për brezin e ri Kancelari kujtoi edhe përplasjet e vitit të kaluar me delegatët e Unionit të të Rinjve, kur reforma e pensioneve shkaktoi debate të ashpra brenda partisë.
Këtë herë, ai u përpoq të theksonte rëndësinë e përfshirjes së të rinjve në vendimmarrje dhe të një reforme që merr parasysh interesat e brezave të ardhshëm. “Dua që të miratojmë një reformë që e meriton këtë emër dhe që, në frymën e drejtësisë ndërbreznore, merr parasysh interesat e të rinjve në vendin tonë”, tha Merz.
Ai shtoi se një reformë e tillë është e rëndësishme për brezin e ri dhe për të gjithë Gjermaninë. Ndryshe nga debati i vitit të kaluar, këtë herë deklaratat e kancelarit për reformën e pensioneve u pritën me duartrokitje nga delegatët e rinj të CDU-së.