Ish-kryetari i Komunës së Strumicës, Kostadin Kostadinov, ka reaguar në Facebook lidhur me kallëzimin penal të ngritur kundër tij dhe dy personave të tjerë, me të cilin policia i dyshon për keqpërdorim të pozitës dhe autorizimit zyrtar, si dhe për falsifikim të dokumenteve.
Në reagimin e tij, Kostadinov thekson se funksioni publik sjell përgjegjësi dhe se është i gatshëm të japë llogari për çdo vendim të marrë, pasi, siç thotë, ka qenë i bindur se vendimet i ka marrë në përputhje me ligjin dhe pas procedurave të parapara.
“Për një periudhë të gjatë jam i ekspozuar ndaj publikimeve të vazhdueshme në opinion, në të cilat emri im lidhet me dyshime dhe akuza të pabazuara, ndoshta për shkak të interesave dhe intrigave të përditshme të dikujt.
Përsëritja e tyre e vazhdueshme krijon përshtypjen se përgjegjësia tashmë është përcaktuar, para se të dëgjohen argumentet e mia dhe të vlerësohen provat që kam në numër të madh.
Me rekomandimin e ekipit tim juridik, deri më tani jam përmbajtur nga reagimet, në shenjë respekti ndaj procedurave dhe institucioneve, sepse vetëm në këtë mënyrë mund të ndërtojmë një shtet të mirëfilltë juridik evropian. Kjo përmbajtje është zgjedhje e vetëdijshme, e jo mungesë argumentesh”, ka shkruar Kostadinov.
Ai shton se mbrojtjen e tij do ta zhvillojë aty ku përcaktohet e vërteta dhe merret vendimi për përgjegjësinë. “Nga mediat pres raportim të saktë dhe të përgjegjshëm, ndërsa nga të gjithë pjesëmarrësit në jetën publike kërkoj respektimin e dinjitetit tim dhe të prezumimit të pafajësisë. Kritika është pjesë përbërëse e demokracisë.
Dënimi i shpallur paraprakisht e minon drejtësinë dhe cenon rëndë besimin te institucionet. Nuk kërkoj besim vetëm në bazë të fjalëve. Kërkoj hapësirë që faktet të dëgjohen dhe provat të vlerësohen në mënyrë të paanshme. Jam i gatshëm të jap llogari për veprimet e mia.
Besoj në sundimin e së drejtës dhe kundërshtoj fuqishëm mënyrat e shmangies së drejtësisë, të cilat jemi dëshmitarë se po ndodhin, si rasti me 50 tonë marihuanë të kapur në mënyrë të paligjshme, si dhe shumë raste të tjera për të cilat dëgjojmë vazhdimisht”, ka shkruar Kostadinov.
Ai pret që edhe të tjerët të marrin përgjegjësi për fjalët e thëna publikisht, duke theksuar se respektin që ua ka treguar institucioneve dhe opinionit publik e pret edhe për veten.
“Për secilin që ka vendosur që me vetëdije të më shkaktojë dëm mua, fëmijës tim të porsalindur dhe gjithë familjes sime, e cila ndër vite e ka ndërtuar autoritetin dhe dinjitetin e saj përmes ndihmës dhe mbështetjes ndaj të gjithëve, deklaroj me përgjegjësi se kjo nuk do të mbetet e harruar dhe pa përgjegjësi para institucioneve”, ka porositur Kostadinov.