Një veprim që duket i parëndësishëm mund të ndryshojë rezultatin dhe të krijojë shqetësim të panevojshëm Matja e tensionit arterial është një procedurë e zakonshme, por një gabim që shumë njerëz e bëjnë pa e kuptuar mund të ndikojë ndjeshëm në rezultat: të folurit gjatë matjes .
Edhe një bisedë e shkurtër mund ta rrisë përkohësisht tensionin, duke bërë që aparati të tregojë vlera më të larta sesa ato që personi ka në gjendje qetësie. Për një rezultat të besueshëm nuk mjafton vetëm një aparat cilësor. Rëndësi kanë edhe pozicioni i trupit, pushimi përpara matjes dhe heshtja gjatë procedurës. Sa mund ta rrisë tensionin një bisedë?
Sipas një rishikimi sistematik të publikuar në vitin 2017 në revistën shkencore Journal of Hypertension , ku u analizuan mbi 300 studime për faktorët që ndikojnë në saktësinë e matjes së tensionit arterial, të folurit mund të shkaktojë rritje të konsiderueshme të vlerave.
Në gjashtë studime që shqyrtuan ndikimin e bisedës gjatë matjes, u regjistruan këto ndryshime: Tensioni sistolik (vlera e sipërme): rritje prej 4 deri në 19 mmHg. Tensioni diastolik (vlera e poshtme): rritje prej 5 deri në 14,3 mmHg. Kjo nuk do të thotë se tensioni rritet njësoj te të gjithë. Ndikimi ndryshon sipas personit dhe aktivitetit gjatë matjes.
Në disa studime pjesëmarrësit lexonin ose numëronin me zë, ndërsa në të tjera zhvillonin biseda të zakonshme apo diskutonin tema stresuese, transmeton Telegrafi. Pse rritet tensioni kur flasim? Të folurit aktivizon zona të ndryshme të trurit dhe mund të nxisë reagime fiziologjike që ndikojnë përkohësisht në tensionin arterial dhe ritmin e zemrës.
Një nga shpjegimet lidhet me aktivizimin e sistemit nervor simpatik, i cili përgatit organizmin për aktivitet dhe stres. Ky reagim mund të shoqërohet me rritjen e veprimit të hormoneve, përfshirë adrenalinën. Prandaj, gjatë matjes duhet të qëndroni të qetë dhe të mos flisni, madje as për t’iu përgjigjur një pyetjeje të shkurtër.
Gabimet e tjera që mund ta ndryshojnë rezultatin Përveç bisedës, në saktësinë e matjes ndikojnë edhe pozicioni i trupit, përgatitja dhe aparatura. Rezultati mund të jetë i pasaktë nëse qëndroni me këmbë të kryqëzuara, nuk e mbështetni shpinën, e mbani krahun jashtë nivelit të zemrës ose vendosni manshetën mbi rroba.
Ndikim mund të kenë edhe konsumimi i kafesë, duhani, aktiviteti fizik pak para matjes dhe fshikëza urinare e mbushur. Te disa persona shfaqet edhe fenomeni i njohur si efekti i mantelit të bardhë , kur tensioni rritet përkohësisht në ordinancën e mjekut për shkak të ankthit ose shqetësimit.
Për matje të besueshme, rekomandohet përdorimi i një aparati të validuar, me manshetë që i përshtatet madhësisë së krahut. unsplash+ Si ta matni saktë tensionin në shtëpi? Sipas udhëzimeve të Shoqatës Amerikane të Zemrës (American Heart Association – AHA), për të siguruar rezultate sa më të sakta, duhet të ndiqni disa rregulla të thjeshta: 1.
Shmangni kafenë, duhanin dhe ushtrimet fizike të paktën 30 minuta përpara matjes. Zbrazni edhe fshikëzën urinare. 2. Pushoni të paktën pesë minuta. Uluni në karrige, mbështetni shpinën dhe vendosni shputat në dysheme, pa i kryqëzuar këmbët. 3. Vendosni manshetën në krahun e zhveshur , jo mbi rroba, sipas udhëzimeve të aparatit. 4.
Mbështeteni krahun mbi tavolinë , në mënyrë që mesi i manshetës të jetë në nivelin e zemrës. 5. Mos flisni dhe mos lëvizni gjatë matjes. Shmangni edhe përdorimin e telefonit. 6. Përsëriteni matjen pas një minute dhe shënoni të dyja rezultatet, së bashku me datën dhe orën.
Shoqata Amerikane e Zemrës rekomandon gjithashtu përdorimin e një aparati automatik të validuar për matjen në pjesën e sipërme të krahut dhe mbajtjen e një regjistri të rezultateve për t’ia treguar mjekut. Çfarë të bëni nëse keni folur gjatë matjes? Nëse keni biseduar gjatë matjes, qëndroni përsëri në qetësi për disa minuta dhe përsëriteni procedurën duke respektuar pozicionin e duhur.
Një rezultat i vetëm i lartë nuk do të thotë domosdoshmërisht se keni hipertension. Nëse vlerat e larta përsëriten, konsultohuni me mjekun dhe tregojini rezultatet e regjistruara. Nëse tensioni sistolik është mbi 180 mmHg ose ai diastolik mbi 120 mmHg, përsëriteni matjen pas të paktën një minute dhe kërkoni menjëherë këshillë mjekësore nëse mbetet kaq i lartë.
Nëse këto vlera shoqërohen me dhimbje gjoksi, vështirësi në frymëmarrje, dobësi të papritur, çrregullime të të folurit ose ndryshime të shikimit, kërkoni ndihmë urgjente. Mos e ndryshoni dozën e barnave dhe mos e ndërprisni trajtimin pa u konsultuar me mjekun.
Ndonjëherë, pesë minuta pushim dhe pak heshtje janë të mjaftueshme për të shmangur një rezultat të pasaktë dhe shqetësimin e panevojshëm që mund të shkaktojë ai.