Kryetari i Komunës së Vitisë, Sokol Haliti, ka shprehur ngushëllimet e tij për familjen Bogujevci nga Pozherani, pas vdekjes tragjike të dy anëtarëve të kësaj familjeje dhe plagosjes së një personi tjetër.
Përmes një reagimi publik, Haliti ka shprehur pikëllimin e thellë për këtë ngjarje, duke i shprehur ngushëllimet më të sinqerta familjes së viktimave, të afërmve dhe të gjithë atyre që po përballen me këtë humbje të rëndë. Ai gjithashtu i ka uruar shërim të shpejtë dhe të plotë personit të plagosur.
Kryetari Haliti e ka cilësuar rastin si një ngjarje të rëndë që trondit qytetarët, duke kërkuar nga organet kompetente që të veprojnë me urgjencë për zbardhjen e plotë të rrethanave dhe vënien para drejtësisë të përgjegjësve.
Ai ka theksuar se dhuna dhe humbja e jetëve njerëzore janë të papranueshme, ndërsa siguria e qytetarëve dhe mbrojtja e jetës duhet të mbeten përparësi e institucioneve dhe e gjithë shoqërisë. Në fund të reagimit, Haliti ka shprehur solidaritetin e tij me familjen Bogujevci në këto momente të vështira, duke i përcjellë edhe një herë ngushëllimet më të sinqerta për humbjen e dy familjarëve.