Punëtorët e një impianti të trajtimit të ujërave të zeza në Alabama të SHBA-së kanë gjetur një unazë të vjetër shkolle gjatë pastrimit të një bllokimi në kanalizime dhe, pas disa muajsh kërkimesh, kanë arritur t’ia kthejnë pronarit të saj, i cili nuk e kishte parë prej dekadash.
Junior Riner, punonjës në impiantin e ujërave të zeza në Sheffield, tha se ekipi i tij e gjeti unazën gjatë pastrimit të një tubacioni të bllokuar. Ajo i përkiste shkollës së mesme Burrell-Slater, të cilën pronari e kishte përfunduar në vitin 1965.
Riner zbuloi se shkolla, e cila u shërbente nxënësve me ngjyrë në qytetin Florence, ishte mbyllur në vitin 1969, në kuadër të procesit të integrimit shkollor. Ai më pas gjeti një grup të ish-nxënësve në Facebook dhe publikoi një fotografi të unazës, ku dalloheshin inicialet OJM. Për disa muaj nuk pati asnjë përgjigje.
Më pas, në kërkim u përfshi edhe dhëndri i Rinerit, i cili gjeti në internet një fotografi të disa të diplomuarve të shkollës. Njëri prej tyre ishte identifikuar si Oscar James Meredith, transmeton Telegrafi. Babai i dhëndrit, i cili është anëtar i këshillit të qytetit, ndihmoi në gjetjen e vajzës së Meredithit, April Meredith Moore.
Moore e pyeti të atin, tashmë 79 vjeç, nëse kishte humbur ndonjëherë një unazë shkolle. Meredith tregoi se unazën ia kishte dhuruar të dashurës së tij të gjimnazit, Annës, e cila më vonë u bë bashkëshortja e tij dhe nëna e Moore. Kështu, pas shumë dekadash dhe një kërkimi që nisi nga një bllokim në kanalizime, unaza arriti të lidhej sërish me historinë e familjes së saj.