Partia Liberale e Gjelbër e Zvicrës (PVL/GLP) propozon krijimin e një aleance alpine mes Zvicrës, Gjermanisë, Francës, Italisë dhe Austrisë, e cila do të mundësonte operimin e avionëve luftarakë pa kufizime kufitare mes këtyre shteteve.
Sipas raportimit të Watson , këshilltari kombëtar Matthias Jauslin (AG/GLP) ka ngritur shqetësime për përgatitjen ushtarake të Evropës Perëndimore përballë konflikteve moderne, veçanërisht atyre ku përdoren dronët. Ai paralajmëron se Evropa Perëndimore është “absolutisht e papërgatitur” për një luftë të dominuar nga dronët, raporton 24 heures , transmeton Telegrafi.
Propozimi i PVL-së synon të mundësojë bashkëpunim më të ngushtë mes pesë shteteve, të cilat së shpejti do të kenë gjithsej 180 avionë luftarakë F-35. Italia do të ketë 109 avionë të këtij lloji, Gjermania 35 dhe Zvicra 30.
Sipas propozimit, avionët do të mund të operonin përtej kufijve shtetërorë, duke i mundësuar, për shembull, një avioni zviceran F-35 të ndiqte një kërcënim deri në Mesdhe ose në Vjenë. “Nuk ka më kuptim të presësh armikun në kufi me një halberdë”, ka deklaruar Jauslin.
PVL kërkon më pak ushtarë dhe më shumë investime në teknologji Jauslin propozon gjithashtu uljen e numrit të pjesëtarëve të ushtrisë zvicerane nga 147 mijë në 80 mijë, me investime në sisteme inteligjente për të kompensuar këtë reduktim.
Ai kritikon debatet për pajisjet tradicionale ushtarake, duke argumentuar se kërcënimet kryesore tashmë vijnë nga ajri dhe hapësira kibernetike, transmeton Telegrafi. PVL-ja kërkon që Zvicra të marrë pjesë në programet evropiane për zhvillimin e dronëve autonomë dhe të sistemeve të luftimit të mbështetura nga inteligjenca artificiale.
Megjithatë, Zvicra tashmë është duke ndërmarrë hapa në këtë drejtim. ArmaSuisse dhe Departamenti Federal i Mbrojtjes, Mbrojtjes Civile dhe Sportit (DDPS) po bashkëpunojnë me Qendrën Zvicerane për Drone dhe Robotikë. Ndërkohë, janë duke u zhvilluar negociata me NATO-n dhe vendet fqinje për krijimin e një pamjeje të përbashkët të hapësirës ajrore ndërkufitare.
Presidenti i Qendrës, Gerhard Pfister, kishte ngritur ide të ngjashme pas sulmit rus ndaj Ukrainës, por ato ende nuk janë materializuar. PVL: Bashkëpunimi nuk e cenon neutralitetin Sipas PVL-së, koordinimi ushtarak me vendet fqinje nuk do të përbënte shkelje të neutralitetit zviceran.
Partia mbështetet edhe në refuzimin popullor të forcimit të neutralitetit për të argumentuar se bashkëpunimi evropian gëzon mbështetje të gjerë. Në vitin 2022, Viola Amherd, atëherë në krye të DDPS-së, kishte deklaruar se Zvicra po shqyrtonte mundësitë për të përmirësuar bashkëpunimin me NATO-n, me kusht që të respektohej e drejta e neutralitetit.
Po atë vit, një studim i Avenir Suisse mbështeti shfrytëzimin e plotë të potencialit të avionëve F-35A përmes pjesëmarrjes së Zvicrës në stërvitjet ajrore të NATO-s, pa u bërë anëtare e Aleancës.