Lara Gut – Behrami (35) mungon për herë të parë në hapjen e Kupës së Botës në Solden në skijim. Pas tërheqjes së saj në gusht, e ardhmja e saj mbetet e paqartë. A do të vazhdojë zvicerania nga Ticino të jetë pjesë e skijimit në një rol tjetër? Kur do ta shohim përsëri Lara Gut-Behramin në publik? Gjatë verës ajo ndoqi ndeshjen e kombëtares zvicerane të futbollit kundër Argjentinës.
Blanc e quan atë një “legjendë” dhe i uron Gut-Behramit gjithë të mirat. Megjithatë, as Blanc nuk di diçka konkrete. Një gjë është e sigurt: Gut-Behrami do t’i përgjigjej telefonit nëse Blanc do t’i kërkonte këshillë. “Pas pak më shumë se tri javësh nis dimri, të paktën në Kupën e Botës në ski. Në Sölden të Austrisë zhvillohet tradicionalisht gara hapëse. Si gjithmonë.
Por… jo krejt si gjithmonë. Lara Gut-Behrami (35) do të mungojë për herë të parë. Ajo kishte marrë pjesë 16 herë në garën e Soldenit, që nga viti 2008, dhe tri herë kishte fituar atje. Tërheqja e saj është një goditje për skijimin zviceran”, ka shkruar mes të tjera mediumi zviceran “Blick”.
“Por është edhe një mundësi për të tjerat që të shkëlqejnë dhe të tregojnë se çfarë dinë të bëjnë”, thotë trajneri i ekipit të femrave, Beat Tschuor. Në javën tradicionale promovuese të Swiss-Ski në Dübendorf, kantoni i Zurich-ut, Gut-Behrami është më shumë një figurë periferike. Nuk është çudi: që nga 5 gushti, kur njoftoi tërheqjen, është bërë shumë e qetë rreth saj.
Ajo u shfaq vetëm në ndeshjen e 1/8 së finales së Botërorit të futbollit, Zvicër–Argjentinë, në Kansas City, SHBA, së bashku me bashkëshortin e saj Valon Behrami (40). Më pas u tërhoq sërish nga publiku. Pastaj talentja e garave të shpejta, Malorie Blanc (22), pyetet në një takim me mediat për Gut-Behramin.
Fillimisht ajo thotë diçka jo shumë befasuese: “ Shpresoj që ajo të ketë një kohë të bukur pas karrierës së skijimit.” Ajo e quan Gut-Behramin “një legjendë”. Blanc ka skijuar me të vetëm për dy vjet dhe thotë se do të kishte dashur të merrte edhe më shumë këshilla prej saj. Të dyja e vlerësojnë njëra-tjetrën. Në fund, Blanc thotë: “Mendoj se ajo do të mbetet në botën e borës dhe skijimit.
Këtë ndoshta e kam dëgjuar diku. Do të ishte bukur.” Dhe menjëherë nisën spekulimet në Dübendorf. “Blick” e pyet Blanc pas konferencës: A ka dëgjuar diçka konkrete për Gut-Behramin? “Jo. Lara dhe unë kemi kaluar gjithmonë shumë mirë bashkë. Mendoj se do të ishte thjesht keq nëse sporti i skijimit nuk do të përfitonte më nga përvoja dhe njohuritë e saj”.
Pra lind pyetja: Çfarë roli mund të ketë Gut-Behrami në të ardhmen në sportet e dëborës? Ish-skiatore, analiste në RSI apo rol te Swiss Olympic? Si trajnere e skijimit, ka pak gjasa ta shohim. Po si bashkëkomentuese televizive? Për televizionin e Ticinos do të ishte një mundësi e jashtëzakonshme. Por “Blick” pyeti RSI-në dhe aty e mohojnë, Gut-Behrami nuk do të analizojë garat.
Një tjetër mundësi lidhet me Swiss Olympic. Për projektin Olympia 2038 në Zvicër, Gut-Behrami do të ishte një ambasadore shumë e njohur – ngjashëm me Michelle Gisin (32) dhe Blanc, të cilat janë ambasadore për Botërorin e vitit 2027 në Crans-Montana. Në fund, vetëm Lara Gut-Behrami e di se cilat dyer do t’i hapë në të ardhmen. Deri atëherë, gjithçka mbetet hipotezë.
Por është një hipotezë që ngjall kureshtje.