Një grua 25-vjeçare ka vdekur në Qendrën Klinike Universitare të Kosovës (QKUK), pasi kishte pësuar plagë nga arma e zjarrit në fshatin Kërvasari të Malishevës. Sipas Prokurorisë Themelore në Gjakovë, viktima ishte bashkëshortja e personit të dyshuar, i cili po ashtu ka pësuar plagë të rënda nga arma e zjarrit.
I dyshuari, 26-vjeçar, është dërguar për trajtim mjekësor në QKUK dhe, sipas njoftimit të Prokurorisë, është në gjendje të rëndë dhe kritike për jetën. Prokurori i Shtetit ka dalë në vendin e ngjarjes, ndërsa me urdhër të tij trupi i pajetë i viktimës është dërguar në Institutin e Mjekësisë Ligjore (IML) në Prishtinë për autopsi.
Rasti është iniciuar për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”. Prokuroria ka bërë të ditur se, në koordinim me Policinë e Kosovës, po ndërmerr veprimet e nevojshme për të ndriçuar plotësisht rrethanat e rastit dhe për të siguruar provat relevante.
Kurse, drejtori i Klinikes Emergjente në QKUK, Naser Syla, ka konfirmuar për KALLXO.com se viktima ishte shtatzënë. “Janë sjellë dy të plagosur me armë zjarri nga Malisheva, një femër dhe një mashkull, femra shtatzënë 34-javësh, edhe për kundër të gjitha masave reanimatore të ndërmarra nga ekipi kujdestar nuk ka mundur të ju përballojë plagëve dhe ka ndërruar jetë në Qendrën Emergjente.” – tha Syla.
Çifti janë gjetur të plagosur në një dhomë gjumi. Rasti është konfirmuar për KALLXO.com nga zëdhënësja e Policisë së Kosovës për rajonin e Gjakovës, Vlera Krasniqi. Sipas Policisë, rasti është raportuar më , rreth orës , ndërsa njësitë policore kanë dalë menjëherë në vendin e ngjarjes.
“Njësitë policore kanë dalë menjëherë në vendin e ngjarjes, ku në një dhomë gjumi janë gjetur dy persona, një çift bashkëshortor, të plagosur nga arma e zjarrit”- ka thënë Krasniqi. Të plagosurve u është ofruar ndihma e parë mjekësore, pas së cilës janë dërguar për trajtim në Qendrën Klinike Universitare të Kosovës (QKUK).
Në vendin e ngjarjes, Policia ka gjetur dhe sekuestruar një armë zjarri, e cila dyshohet se është përdorur në rast. Rreth orës , Policia është njoftuar nga QKUK-ja se gruaja ka ndërruar jetë si pasojë e plagëve të marra.