Në këtë fazë të jetës, lidhjet e reja nuk ndërtohen më mbi të njëjtat pritshmëri – studimet tregojnë se afërsia, përkushtimi dhe mirëkuptimi marrin një peshë tjetër Edhe pse martesa tradicionalisht lidhet me çiftet e reja që janë në fillim të jetës së përbashkët, ndryshimet demografike po sjellin një realitet tjetër.
Njerëzit jetojnë më gjatë, ndërsa ndarjet pas dekadash martese, të ashtuquajturat “divorce gri”, janë gjithnjë e më të shpeshta. Kjo ngre pyetjen nëse lidhjet e reja në moshë më të pjekur mund të jenë të suksesshme dhe çfarë duhet që ato të funksionojnë.
Lidhjet e reja në shifra Një studim i vitit 2025, i udhëhequr nga Susan Brown dhe kolegët e saj në Universitetin Bowling Green, tregoi se pas divorcit në moshën mbi 50 vjeç, 37 për qind e burrave dhe 22 për qind e grave hyjnë në një lidhje të re romantike.
Bashkëjetesa është më e zakonshme se martesa formale, pasi shumë njerëz në këtë moshë nuk e shohin më të domosdoshëm zyrtarizimin e lidhjes. Ka edhe dallime mes burrave dhe grave. Burrat që krijojnë lidhje të reja zakonisht kanë pas vetes martesa më të gjata, ndërsa ata që janë martuar disa herë kanë më shumë gjasa të kërkojnë sërish një partnere.
Në moshë më të madhe, gratë shpesh janë më pak të interesuara për një lidhje të re, pjesërisht për shkak të ndarjes tradicionale të roleve në çift, ku përgjegjësitë e shtëpisë dhe kujdesit shpesh bien më shumë mbi to. Psikologjia e një fillimi të ri Studiuesit analizuan edhe të dhënat e Studimit për Shëndetin dhe Pensionimin.
Ata identifikuan 171 burra dhe 78 gra që, pas divorcit, kishin hyrë në një lidhje të re. Prej tyre, 56 për qind e grave zgjodhën të martoheshin sërish, krahasuar me 40 për qind të burrave. Faktorë si arsimi, puna, pasuria, shëndeti, kontaktet shoqërore dhe historia martesore u analizuan për të kuptuar se çfarë i dallon ata që martohen sërish nga ata që zgjedhin vetëm bashkëjetesën.
Përveç gjendjes ekonomike, një rol të madh pati pikërisht historia e martesës së mëparshme. Personat që ishin divorcuar zyrtarisht kishin më shumë gjasa të kërkonin një partner të ri sesa ata që kishin mbetur vetëm të ndarë. Kjo tregon se përvojat e mëparshme vazhdojnë të ndikojnë edhe në vendimet e mëvonshme emocionale, transmeton Telegrafi.
Dashuria në moshë të pjekur duket ndryshe Një studim tjetër, i udhëhequr nga Chaya Koren nga Universiteti i Haifës, analizoi 38 çifte të moshës 66 deri në 92 vjeç. Pjesëmarrësit e përshkruan dashurinë si një gjendje në të cilën ndihesh mirë me tjetrin. Ata folën për dashuri të këndshme, prindërore dhe vëllazërore.
Edhe në këto lidhje ekzistojnë fazat e dashurimit dhe më pas të qetësimit të emocioneve, por mbetet kujdesi për partnerin. Një nga gjetjet më interesante ishte se këta çifte e përshkruanin dashurinë si ekskluzive dhe të mbështetur në përkushtim, afërsi dhe kujdes.
Megjithëse pasioni mbetet i pranishëm, te çiftet më të moshuara dhembshuria dhe afërsia emocionale rezultojnë shpesh më të rëndësishme se vetë pasioni . Realiteti i lidhjes pas të 50-ave Kur këto studime shihen së bashku, del se njerëzit në moshë më të pjekur nuk hyjnë në lidhje të reja vetëm për arsye praktike.
Shumë prej tyre kërkojnë ngrohtësi, afërsi, shoqëri dhe një partner me të cilin ndihen të kuptuar. Një nga pjesëmarrëset në studim e përshkroi partnerin e saj të ri si dikë që dinte ta shfaqte dashurinë në një mënyrë që bashkëshorti i mëparshëm nuk e kishte bërë.
Megjithatë, mbeten edhe shumë çështje praktike: çfarë ndodh me pronën, si ndërthuren marrëdhëniet me fëmijët dhe nipërit, dhe sa vend duhet t’i jepet familjes së zgjeruar. Pavarësisht këtyre sfidave, studimet sugjerojnë se lidhjet e reja në moshë më të pjekur mund të jenë shumë të qëndrueshme.
Ato shpesh mbështeten më pak te idealizimi romantik dhe më shumë te përkushtimi, mirëkuptimi, siguria emocionale dhe ndjenja se ke pranë dikë me të cilin vërtet dëshiron ta ndash jetën .