Ekipet e shpëtimit në Ukrainë po vazhdojnë kërkimet nën rrënojat e një qendre tregtare në qytetin e Kryvyi Rih, pas një sulmi vdekjeprurës me dron rus, ku deri tani janë konfirmuar 16 viktima dhe 130 të plagosur. Sipas zyrtarëve lokalë, nëntë persona rezultojnë ende të zhdukur, ndërsa ekipet e kërkim-shpëtimit po punojnë për të gjetur të mbijetuar të mundshëm nën rrënoja.
Presidenti ukrainas, Volodymyr Zelensky, e ka cilësuar sulmin si “cinik dhe të neveritshëm”, duke thënë se ai u krye në dy valë. Sipas tij, vala e dytë e sulmit kishte në shënjestër punonjësit e emergjencës që ndodheshin në vendngjarje. Një tjetër viktimë u nxor nga rrënojat gjatë natës, duke e çuar numrin e të vdekurve në 16.
Kreu ushtarak i rajonit të Dnipropetrovskut, Oleksandr Hanzha, ka bërë të ditur se 23 fëmijë janë në mesin e personave të plagosur. Hanzha kishte deklaruar më herët se 29 persona ishin në gjendje të rëndë, duke ngritur shqetësime se bilanci i viktimave mund të rritet.
Për të ndihmuar në operacionin e kërkim-shpëtimit, ekipet nga katër rajone të tjera të Ukrainës janë dërguar në mënyrë urgjente në zonën e goditur. Ndërkohë, zyrtarët lokalë kanë njoftuar se të paktën dy persona të tjerë u vranë nga sulme të mëvonshme ruse në orët e para të së shtunës.
Ministria ruse e Mbrojtjes ka deklaruar se objektivat e sulmeve ishin infrastruktura e transportit dhe depot. Kryebashkiaku i Kryvyi Rih, Oleksandr Vilkul, tha se dronët rusë po fluturonin në “lartësi jashtëzakonisht të ulëta”, ndërsa i përshkroi sulmuesit si “kafshë”. Sinjali – aty ku e vërteta flet para lajmit!