Lionel Messi është gjobitur nga Major League Soccer (MLS) për një incident të ndodhur në fund të ndeshjes mes Inter Miamit dhe Philadelphia Union, e cila përfundoi me rezultat 2-2.
Komiteti Disiplinor i MLS-së i ka shqiptuar yllit argjentinas një gjobë, shuma e së cilës nuk është bërë publike, për shkelje të rregullores që ndalon kontaktet me duar në fytyrën, kokën apo qafën e një kundërshtari. Incidenti ndodhi në minutat shtesë të takimit, kur Messi iu afrua Quinn Sullivanit, ndërsa topi ndodhej në një pjesë tjetër të fushës.
Pas një shkëmbimi fjalësh mes tyre, Messi e goditi Sullivanin në pjesën e pasme të qafës. Sullivan reagoi duke u përballur me kapitenin e Inter Miamit, në një moment tensioni mes dy lojtarëve. Arbitri Filip Dujic nuk e pa drejtpërdrejt incidentin dhe për këtë arsye as Messi dhe as Sullivan nuk u ndëshkuan me karton.
Për të njëjtën shkelje është gjobitur edhe mbrojtësi i Inter Miamit, Ian Fray. Ndërkohë, në një tjetër përplasje gjatë kohës shtesë, arbitri ndëshkoi me karton të kuq Cavan Sullivanin, vëllain më të vogël të Quinn Sullivanit, si dhe mesfushorin e Inter Miamit, Yannick Bright.
Ndeshja mes Inter Miamit dhe Philadelphia Union përfundoi 2-2, ndërsa incidentet e minutave të fundit sollën masa disiplinore nga MLS-ja. Sinjali – aty ku e vërteta flet para lajmit!