Sekretari amerikan i Thesarit, Scott Bessent, u ka bërë thirrje aleatëve të Shteteve të Bashkuara që t’i bashkohen Uashingtonit në një fushatë të re për të goditur rëndë ekonominë iraniane. Në një intervistë për CNBC, Bessent ka deklaruar se administrata amerikane synon ta rrisë ndjeshëm presionin ekonomik ndaj Teheranit. “Ne do ta rrëzojmë këtë regjim.
Është koha që aleatët tanë dhe pjesa tjetër e botës të marrin një vendim”, ka thënë ai. “Ose jeni me ne, ose kundër nesh”, ka shtuar Bessent. Deklaratat e tij vijnë pasi presidenti amerikan Donald Trump paralajmëroi se vendet që i ofrojnë “çfarëdo lloj ndihme” Iranit do të përballen me pasoja të rënda ekonomike.
Bessent nuk ka dhënë ende detaje për masat konkrete që pritet të ndërmerren, por ka thënë se presioni ekonomik synon të shmangë nevojën për një përshkallëzim të ri ushtarak në shkallë të gjerë. Sipas tij, masat e reja do të jenë pjesë e asaj që ai e cilësoi si “izolimi më i madh ekonomik i koordinuar në historinë e botës”.
“Nëse këmbëngulni të bëni biznes me ta, qoftë duke transferuar para apo duke blerë naftën e tyre, atëherë Thesari dhe qeveria e SHBA-së do të përdorin të gjithë fuqinë e tyre kundër jush”, ka paralajmëruar Bessent.
Tensionet mes SHBA-së, Izraelit dhe Iranit janë rritur ndjeshëm gjatë këtij viti, ndërsa Teherani ka kufizuar rëndë qarkullimin në Ngushticën e Hormuzit, një prej korridoreve më të rëndësishme energjetike në botë. Megjithëse palët kanë arritur disa armëpushime gjatë muajve të fundit, marrëveshjet janë shkelur vazhdimisht dhe negociatat për një zgjidhje më të qëndrueshme kanë ngecur.
Sinjali – aty ku e vërteta flet para lajmit!