Zyra e kryeministrit izraelit, Benjamin Netanyahu, ka mohuar raportimet se është miratuar vendosja e Forcës Ndërkombëtare të Stabilizimit (ISF) në Rripin e Gazës, si pjesë e planit të pasluftës të presidentit amerikan Donald Trump.
“Në kundërshtim me raportet e medias, establishmenti politik nuk e ka miratuar hyrjen e forcës ndërkombëtare në Rripin e Gazës”, thuhet në deklaratën e zyrës së Netanyahut. Në të njëjtën deklaratë është ritheksuar qëndrimi i Izraelit se rindërtimi i Gazës nuk do të nisë pa çarmatosjen e plotë të Hamasit.
Reagimi erdhi pas publikimit të disa pamjeve në mediat izraelite, ku shiheshin oficerë të huaj ushtarakë duke vizituar zonën e Rafahut së bashku me pjesëtarë të ushtrisë izraelite. Disa media i kishin interpretuar këto pamje si vendosjen e parë të forcës ndërkombëtare në Gaza.
Megjithatë, një zyrtar izraelit ka deklaruar për The Times of Israel se bëhej fjalë vetëm për një inspektim paraprak nga oficerë të lartë ushtarakë nga Burundi dhe Uganda. Sipas raportimeve, vizita ishte pjesë e diskutimeve rreth mundësisë së përfshirjes së këtyre vendeve në forcën ndërkombëtare.
Forca e planifikuar pritet të përbëhet nga rreth 200 ushtarë nga vende mike dhe, sipas propozimit, do të vendosej në Gaza pas tërheqjes së forcave izraelite, me detyrë sigurimin e zonave dhe mbështetjen e operacioneve humanitare. Megjithatë, zbatimi i planit është vonuar për shkak të mosmarrëveshjeve lidhur me çarmatimin e Hamasit dhe tërheqjen e trupave izraelite.
Ndërkohë, administrata Trump ka informuar Kongresin amerikan se synon të ndajë më shumë se 206 milionë dollarë për financimin e forcës ndërkombëtare. Sinjali – aty ku e vërteta flet para lajmit!