Kreu i Partisë Demokratike, Sali Berisha, ka reaguar sot për vrasjen e 20-vjeçarit portugez Luis Miguel Varela Mendes në Ksamil, ngjarje për të cilën Policia e Shtetit ka arrestuar autorin, disa persona dhe ka shpallur një tjetër në kërkim.
Në një deklaratë për mediat, Berisha e lidhi ngjarjen me situatën e sigurisë dhe kriminalitetit në Sarandë, duke e cilësuar vrasjen e turistit të huaj si “pothuajse vrasje shtetërore”. Ai akuzoi qeverinë se ka lejuar, sipas tij, shkrirjen e kufijve mes shtetit dhe krimit në industrinë turistike të zonës.
“Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore. E them këtë në kuptimin, jo se ai u ekzekutua nga njerëz me uniformë, por në kuptimin e vërtetë se industria turistike në Sarandë është në kthetrat e krimit. Në Sarandë, shteti dhe krimi janë një. Ligji nuk ekziston.
Në Sarandë, dhe jo vetëm, flitet gjerësisht për një ekonomi të bazuar në trafiqe droge, njerëzore etj, e cila gëlon nga darka në mëngjes në lokalet e natës, të cilat funksionojnë gjer në agim. Në plazhet e pushtuara, ku nuk gjendet një metër plazh publik, por të gjitha të dominuara nga të fortit që shesin shezlonget qindra euro”, tha Berisha mes të tjerash.