E ardhmja e Hector Fort te Barcelona vazhdon të jetë e pasigurt, pasi klubi katalanas ka vendosur kushte financiare që po e vështirësojnë largimin e mbrojtësit 20-vjeçar. Sipas raportimeve të Mundo Deportivo , Real Sociedad është një nga skuadrat që ka shfaqur interes konkret për Fortin.
Klubi bask po kërkon të përforcojë mbrojtjen dhe e konsideron talentin e Barcelonës si një alternativë interesante për sezonin e ardhshëm. Real Sociedad tashmë ka marrë kontakt me Barcelonën për të kuptuar se cilat janë kërkesat e saj për një marrëveshje. Problemi kryesor mbetet çmimi.
Barcelona kërkon rreth 10 deri në 15 milionë euro për ta shitur përfundimisht lojtarin, shifër që aktualisht nuk është bindëse për Real Sociedad. Skuadra nga San Sebastiani do të preferonte që Forti të transferohej në formë huazimi, një opsion që do t’i jepte mundësinë lojtarit të vazhdonte zhvillimin e tij. Mbrojtësi sezonin e kaluar ishte i huazuar te Elche.
Barcelona, megjithatë, nuk dëshiron një tjetër huazim pa një garanci për përfitim financiar. Nëse arrihet marrëveshje për huazim, katalanasit kërkojnë që në kontratë të vendoset edhe një detyrim për blerje, me një shumë të konsiderueshme. Edhe klubet e tjera të La Ligës që kanë interes për Fortin po përballen me vështirësi të ngjashme për shkak të kërkesave financiare të Barcelonës.
Kjo situatë e bën gjithnjë e më të komplikuar një transferim të tij brenda kampionatit spanjoll. Nëse Barcelona nuk ndryshon qëndrimin e saj, destinacioni i ardhshëm i Fortit mund të jetë jashtë La Ligës, ku klubet nga kampionatet e tjera mund të paraqiten si alternativa më konkrete. Sinjali – aty ku e vërteta flet para lajmit!