Besëlidhja ka hyrë në fazën përfundimtare të përgatitjeve verore dhe, për t’i krijuar ekipit kushte sa më optimale për shkak të temperaturave të larta, drejtuesit e klubit kanë zhvendosur seancat stërvitore në Pogradec. Lezhjanët do të marrin “dozën” e fundit të përgatitjeve para premierës së 5 shtatorit në Kategorinë e Parë, ku sezonin e ri do ta nisin në transfertë ndaj Kukësit.
Paralelisht me përgatitjet, Besëlidhja nuk po humbet terren as në merkato, duke kërkuar përforcimet e fundit në mënyrë që trajneri Elvis Plori ta ketë sa më të plotë grupin. Sipas zërave të merkatos, Besëlidhja pritet të afrojë edhe një sulmues që e njeh mirë futbollin shqiptar. Bëhet fjalë për Festim Alidemën, i cili së fundmi në Shqipëri ka kontribuar te Pogradeci, dy sezone më parë.
Alidema pritet të firmosë sot. 28-vjeçari ka një karrierë të pasur, e cila nisi në Kosovë me Llapin, përpara se të transferohej në Kroaci, ku veshi fanellat e Slaven Belupos dhe Dragovoljac. Më pas, Alidema u rikthye në Kosovë, ku luajti për Dritën dhe Lirinë e Prizrenit. Karrierën në Shqipëri e vijoi me Erzenin në Superiore dhe më pas te Pogradeci, ku spikati dy sezone më parë.
Së fundmi, sulmuesi ka qenë pjesë e Ballkanit në Superligën e Kosovës. Afrimi i Alidemës do t’i jepte Besëlidhjes një tjetër alternativë të rëndësishme në repartin ofensiv dhe do ta bënte sulmin e lezhjanëve edhe më të kompletuar. Në Lezhë tashmë synimi është i qartë, rikthimi në elitën e futbollit shqiptar pas afro dy dekadash.
Për këtë objektiv, drejtuesit po bëjnë lëvizjet e fundit, ndërsa trajneri Plori kërkon ta nisë sezonin me një skuadër sa më konkurruese.