Gjermania ka hapur një qendër të re kërkimore për sigurinë nga dronët, në kuadër të përpjekjeve për të rritur mbrojtjen e aeroporteve, ngjarjeve të mëdha dhe infrastrukturës kritike nga mjetet ajrore të paautorizuara.
Qendra për Teknologjinë e Sigurisë së Dronëve u inaugurua të martën në Cochstedt, rreth 40 kilometra në jug të Magdeburgut, nga ministri i Brendshëm Alexander Dobrindt, ministrja e Kërkimit Dorothee Bär dhe kryeministri i landit Saksonia-Anhalt, Sven Schulze.
Objekti është pjesë e Qendrës Gjermane të Hapësirës Ajrore (DLR) dhe do të fokusohet në zhvillimin dhe testimin e teknologjive që mund të zbulojnë, identifikojnë dhe neutralizojnë dronët e paautorizuar, raporton Euronews, transmeton Sinjali.
Dobrindt e përshkroi kërcënimin nga dronët si pjesë të “luftës së hijes të shekullit XXI”, ndërsa theksoi se qendra do të mundësojë testimin e teknologjive të reja në kushte reale. Hapja e saj vjen në një kohë kur Gjermania është veçanërisht e shqetësuar për përdorimin e dronëve pranë aeroporteve dhe objekteve të ndjeshme.
Në fillim të këtij muaji, pranë një piste në aeroportin e Leipzigut u gjet një dron i pajisur me eksploziv dhe detonator. Aeroporti është një nga qendrat më të mëdha të transportit ajror të mallrave në Evropë dhe përdoret edhe për operacione logjistike të NATO-s.
Pas këtij incidenti, autoritetet gjermane kanë rritur masat e sigurisë dhe është paralajmëruar dyfishimi i numrit të pozitave për mbrojtjen kundër dronëve në Policinë Federale. Megjithatë, zyrtarët gjermanë kanë pranuar se mbrojtja totale ndaj dronëve është praktikisht e pamundur, për shkak të zhvillimit të shpejtë të kësaj teknologjie.
Ministrja Dorothee Bär ka bërë të ditur gjithashtu se një nga projektet që po zhvillohet synon zbulimin, klasifikimin dhe kapjen e dronëve të paautorizuar pranë aeroporteve, stadiumeve, koncerteve dhe zonave të sigurisë. Qendra në Cochstedt bazohet në një strukturë ekzistuese të DLR-së, ku prej vitesh testohen teknologjitë e dronëve në kushte sa më afër situatave reale.
Zona ka një histori të gjatë aviacioni dhe më herët ka shërbyer si aeroport ushtarak sovjetik. Sinjali – aty ku e vërteta flet para lajmit!