Trajneri i Barcelonës, Hansi Flick, ka konfirmuar se Raphinha do ta mbajë shiritin e kapitenit në ndeshjen ndaj Al Ahlyt të Egjiptit, të mërkurën, në kuadër të Trofeut Joan Gamper. Braziliani do të jetë pjesë e grupit të kapitenëve së bashku me Pedrin dhe Eric Garcian, derisa Barcelona ta zhvillojë votimin përfundimtar pasi të kompletohet lista e skuadrës.
Flick shpjegoi sot se vendimi për kapitenin është personal dhe i përkohshëm, pasi klubi ende nuk e ka përfunduar skuadrën për sezonin e ri. Frenkie de Jong është gjithashtu një nga kapitenët e Barcelonës, por aktualisht është i dëmtuar. Flick e theksoi marrëdhënien e mirë që e ka me mesfushorin holandez dhe e hodhi poshtë çdo spekulim rreth të ardhmes së tij.
“Mendoj se kjo fazë përgatitore nuk është si fazat e zakonshme përgatitore”, deklaroi Flick për “Barça TV”. “Tetë lojtarë iu bashkuan stërvitjeve vetëm një javë më parë. Duhet të përshtatemi dhe t’i menaxhojmë gjërat. Nga ajo që kam parë gjatë ditëve të fundit, niveli i cilësisë është rritur shumë. Jam shumë i lumtur me atë që e kam parë në stërvitje.
E kemi një skuadër të madhe dhe jemi gati të luftojmë për gjithçka.” “Për mua gjithashtu, kjo është një ndeshje e jashtëzakonshme, sepse është e para e sezonit në stadiumin tonë, Spotify Camp Nou, me tifozët të pranishëm”, shtoi Flick. “Sezonin e kaluar i fituam të gjitha ndeshjet në shtëpi dhe kjo ishte shumë e rëndësishme për fitimin e titullit të La Ligës.
Mbështetja e tifozëve të Barcelonës ishte fantastike. Na duhet pasioni, energjia dhe mbështetja e tyre.” Flick e sqaroi situatën e kapitenëve. “Raphinha do ta mbajë fjalimin.” “De Jong është kapiteni i tretë, pasi Marc dhe Araujo nuk janë të pranishëm.
Por Frenkie aktualisht nuk është i gatshëm dhe unë kam vendosur përkohësisht për kapitenët derisa ta zhvillojmë votimin, sepse lista e skuadrës nuk është ende e kompletuar.” “Mendoj se do të vijnë edhe lojtarë të tjerë dhe njëri prej lojtarëve mund të largohet. Prandaj, nuk do ta zhvillojmë votimin përpara se lista e skuadrës të jetë e plotë.
Deri atëherë, Raphinha do të jetë kapiten së bashku me Ericun dhe Pedrin. Edhe De Jong, por ai është i dëmtuar.” “Ky është vendimi që e kam marrë dhe marrëdhënia ime me De Jong është shumë e mirë. Ai është një lojtar jashtëzakonisht profesionist dhe marrëdhënia jonë është e shkëlqyer.” “Flas shumë me të për ndeshjen e ardhshme dhe për gjëra të tjera që ndodhin rreth skuadrës.
Ai është një lojtar i rëndësishëm, ka shumë cilësi dhe jep shumë.”