Afati 60-ditor i përcaktuar në Memorandumin e Mirëkuptimit mes Shteteve të Bashkuara dhe Iranit ka përfunduar në mesnatë, pa u arritur një marrëveshje përfundimtare për ndaljen e luftës dhe zgjidhjen e çështjeve të ndërlikuara mes dy vendeve.
Memorandumi ishte nënshkruar më 17 qershor nga presidenti amerikan Donald Trump dhe presidenti iranian Masoud Pezeshkian, me synimin për ndërprerjen e armiqësive dhe hapjen e rrugës drejt një marrëveshjeje më të gjerë brenda 60 ditësh.
Korniza prej 14 pikash, e ndërmjetësuar kryesisht nga Pakistani me mbështetjen e vendeve të tjera të rajonit, përfshinte edhe çështje që lidhen me programin bërthamor të Iranit. Marrëveshja e përkohshme parashikonte rihapjen e Ngushticës së Hormuzit, lehtësimin e disa kufizimeve financiare ndaj Teheranit dhe përcaktimin e bazës për bisedimet e ardhshme mbi programin bërthamor iranian.
Megjithatë, marrëveshja u përball shpejt me probleme. Të dyja palët akuzuan njëra-tjetrën për shkelje të zotimeve, ndërsa mosmarrëveshjet për Ngushticën e Hormuzit u pasuan nga sulme të reja ushtarake në fund të qershorit. Më 8 korrik, Trump kishte deklaruar se Memorandumi i Mirëkuptimit kishte “mbaruar”.
Presidenti amerikan ka bërë të qartë gjithashtu se presioni ekonomik ndaj Iranit mbetet pjesë e strategjisë së Uashingtonit. “Ne thjesht po e vëzhgojmë Iranin me inflacionin e tij të madh dhe faktin që ata nuk kanë para”, kishte deklaruar Trump në fillim të këtij muaji.
Marrëveshja e përkohshme ishte arritur pas më shumë se tre muajsh konflikti, i cili kishte ndikuar rëndë edhe në tregtinë në Gjirin Persik, veçanërisht në eksportet e naftës dhe gazit. Sinjali – aty ku e vërteta flet para lajmit!