Kryeministri i Mbretërisë së Bashkuar, Andy Burnham, ka shkëmbyer mesazhe me një person që shtirej si Susie Wiles, shefja e kabinetit të Shtëpisë së Bardhë dhe një prej këshilltareve më të afërta të presidentit amerikan Donald Trump, raportoi POLITICO duke u thirrur në katër zyrtarë.
Sipas raportimit, Burnham kishte komunikuar me personin përpara se të lindnin dyshimet se kontakti nuk ishte i ligjshëm. Një person i informuar për komunikimet tha se pas hyrjes së Burnham në Downing Street 10 ishin shkëmbyer “disa mesazhe”, por këmbënguli se ato nuk kishin ndonjë rëndësi të veçantë.
Downing Street refuzoi të komentojë rastin, duke thënë se nuk diskuton çështje të sigurisë kombëtare. Incidenti raportohet se shkaktoi shqetësim edhe në Ambasadën britanike në Uashington, e cila e ngriti çështjen me Shtëpinë e Bardhë. Brenda qeverisë britanike u ngritën gjithashtu dyshime se telefoni i Susie Wiles mund të ishte hakuar përsëri.
Vitin e kaluar, Shtëpia e Bardhë dhe FBI kishin nisur një hetim pasi senatorë, guvernatorë dhe drejtues kompanish amerikane kishin marrë mesazhe dhe telefonata nga një person që shtirej si Wiles. Nuk është bërë e ditur se çfarë është diskutuar në komunikimet me Burnham dhe as koha e saktë kur janë dërguar mesazhet.
Sipas POLITICO-s, rasti ishte mbajtur me kujdes larg publikut për shkak të ndjeshmërisë së tij. Sinjali – aty ku e vërteta flet para lajmit!