Një zjarr i përmasave të mëdha ka përfshirë një prej qendrave kryesore logjistike të gjigantit rus të tregtisë online Wildberries, në rajonin e Moskës, pas një nate të shënuar nga sulme të shumta me dronë. Flakët janë raportuar në qendrën logjistike në fshatin Koledino, pranë qytetit të Podolskut.
Objekti shtrihet në një sipërfaqe prej më shumë se 200 mijë metrash katrorë dhe konsiderohet magazina më e madhe e Wildberries. Pamjet e publikuara nga banorët e zonës tregojnë një re të madhe tymi dhe flakë që kanë përfshirë kompleksin. Sipas raportimeve të mediave ruse, një tjetër qendër logjistike e kompanisë, në zonën e Domodedovos, është prekur gjithashtu nga zjarri.
Ngjarjet janë regjistruar gjatë një nate me sulme të gjera me dronë në rajonin e Moskës. Kryebashkiaku Sergei Sobyanin deklaroi se rreth 600 dronë dyshohej se ishin drejtuar drejt rajonit, ndërsa sipas tij, mbrojtja ajrore ruse kishte rrëzuar 201 prej tyre mbi rajonin e Moskës. Megjithatë, këto shifra nuk janë verifikuar në mënyrë të pavarur.
Po ashtu, nuk është konfirmuar nëse zjarri në objektet e Wildberries është shkaktuar drejtpërdrejt nga sulmet me dronë. Autoritetet ruse nuk kanë dhënë ende një bilanc të plotë për dëmet materiale. Ndërkohë, ekipet e emergjencës vijojnë punën për kontrollin e situatës dhe përcaktimin e shkaqeve të zjarrit.
Wildberries është një prej kompanive më të mëdha të tregtisë elektronike në Rusi dhe qendrat e saj logjistike luajnë një rol të rëndësishëm në shpërndarjen e porosive në vend.