Presidenti amerikan Donald Trump ka paraqitur si sukses të administratës së tij rënien më të madhe të çmimeve të barnave me recetë në Shtetet e Bashkuara në më shumë se 60 vjet. Gjatë një aktiviteti, Trump ngriti në duar një artikull të “Washington Post”, duke u kërkuar gazetarëve t’i kushtonin vëmendje titullit. “Titulli kryesor i sotëm është pikërisht ky.
A e patë?”, tha Trump, duke shtuar më pas: “Ju thashë se kjo do të ndodhte”. Megjithatë, vetë artikulli të cilit iu referua Trump theksonte se një pjesë e rëndësishme e rënies së çmimeve mund të lidhet me masa të miratuara gjatë administratës së ish-presidentit Joe Biden.
Bëhet fjalë për Aktin e Reduktimit të Inflacionit, të miratuar në vitin 2022, i cili i dha programit Medicare mundësinë të negociojë drejtpërdrejt me kompanitë farmaceutike për çmimet e disa prej barnave më të përdorura dhe më të shtrenjta. Uljet e para të çmimeve të negociuara përmes këtij mekanizmi hynë në fuqi në fillim të vitit 2026.
Sipas Indeksit të Çmimeve të Konsumatorit, çmimet e barnave me recetë ranë me 3.1 për qind në korrik, duke shënuar rënien më të madhe vjetore në më shumë se gjashtë dekada. Ekspertë të politikave shëndetësore të cituar nga “Washington Post” kanë shprehur skepticizëm ndaj pretendimit se kjo rënie është kryesisht rezultat i politikave të administratës Trump.
Richard Frank, profesor i ekonomisë shëndetësore në Universitetin e Harvardit, ka thënë se ndërhyrjet që lidhen me Aktin e Reduktimit të Inflacionit ka të ngjarë të kenë pasur ndikimin më të madh.
Edhe Stacy Dusetzina, profesore e politikave shëndetësore në Universitetin Vanderbilt, e ka konsideruar ligjin e miratuar gjatë presidencës Biden si shpjegimin më të mundshëm për rënien e çmimeve.
Pavarësisht kësaj, Shtëpia e Bardhë ka vazhduar ta paraqesë uljen e çmimeve si rezultat të politikave të Trump, ndërsa drejtori i komunikimit reagoi në rrjetin X duke shkruar: “Gjithçka falë Presidentit Trump!”. Sinjali – aty ku e vërteta flet para lajmit!