Disa persona kanë mbetur të plagosur pas të shtënave me armë zjarri në Universitetin Shtetëror të Virxhinias në Shtetet e Bashkuara, ndërsa autoritetet po kërkojnë disa persona të dyshuar që ndodhen ende në arrati. Ngjarja ka ndodhur në kampusin universitar, rreth 32 kilometra në jug të Richmondit, ndërsa pas incidentit zona është bllokuar nga Policia.
Sipas Departamentit të Policisë së Universitetit, të shtënat kanë ndodhur në zonën e njohur si “Annexes Quad”, ku disa persona kanë mbetur të plagosur dhe janë dërguar për trajtim në spitalet e zonës. “Policia është në vendin e ngjarjes dhe ju kërkon që ta shmangni zonën”, thuhet në njoftimin e autoriteteve.
Universiteti ka bërë të ditur se në incident dyshohet se janë përfshirë disa persona, ndërsa asnjëri prej të plagosurve nuk besohet se është në rrezik për jetën. Mediumi lokal WTVR ka raportuar se pesë persona janë plagosur, duke iu referuar autoriteteve lokale. Policia po vazhdon kërkimet për personat e dyshuar dhe hetimet për të zbardhur motivin dhe rrethanat e plota të të shtënave.
Incidenti vjen në një kohë kur Shtetet e Bashkuara vazhdojnë të përballen me një numër të lartë të rasteve të të shtënave masive, përfshirë edhe incidente në shkolla dhe kampuse universitare. Sinjali – aty ku e vërteta flet para lajmit!