Presidenti Donald Trump ka konfirmuar se ka ndërruar fshehurazi aeroplanin teksa po largohej nga një samit i NATO-s në Turqi muajin e kaluar, për shkak të një kërcënimi të mundshëm. “Unë veproj sipas udhëzimeve të Shërbimit Sekret dhe ushtrisë. Ata donin që të udhëtoja me një fluturim tjetër, me një aeroplan tjetër”, u tha Trump gazetarëve.
“Unë thjesht duhet të bëj atë që më thonë.” Zbulimi vjen pas raportimeve se Trump më 8 korrik hipi në Air Force One, para syve të kamerave televizive, por më pas u fsheh në një kamion furnizimi me ushqime për t’u transportuar drejt një avioni ushtarak. Ndërrimi i avionit në momentin e fundit ka ngritur pikëpyetje nëse personat që mbetën në avionin “mashtrues” u vunë në rrezik.
Megjithatë, Trump të martën tha se avioni ushtarak me të cilin ai udhëtoi ishte në “rrezik më të madh”. Zyrtarë amerikanë i thanë CBS News, partnerit amerikan të BBC-së, se SHBA-ja kishte zbuluar një kërcënim të besueshëm nga Irani për të goditur avionin me raketë.
New York Times raportoi se inteligjenca amerikane kishte marrë informacione për një person pranë samitit të NATO-s, i cili ishte parë me një raketë të lëshuar nga supi.
Gazetarët dhe disa anëtarë të stafit të Shtëpisë së Bardhë që ndodheshin në avion nuk e dinin se presidenti amerikan ishte nxjerrë fshehurazi si pjesë e një manovre të ndërlikuar, në përgjigje të kërcënimit të mundshëm iranian. Trump kishte thënë më herët se ishte “objektivi numër një” i Iranit gjatë samitit në Ankara.
“Me sa duket, ka pasur një kërcënim”, tha presidenti gjatë një vizite në Air Force One, teksa po merrte pjesë në një aktivitet në Ohio të martën. “Nuk pyeta shumë për këtë. Kam shumë kërcënime.” Ai shtoi: “Kam shumë kërcënime për të cilat ju nuk dini.” Sinjali – aty ku e vërteta flet para lajmit!