Një zjarr i madh është raportuar mbrëmjen e sotme në afërsi të kompleksit Mileniumi, në lagjen Mati 1 në Prishtinë. Gazeta Sinjali ka siguruar pamje nga vendi i ngjarjes, ku shihet tym i dendur që ngrihet mbi zonë, ndërsa rrethanat e incidentit ende nuk janë të qarta.
Sinjali ka kontaktuar zëdhënësin e Brigadës së Zjarrfikësve në Prishtinë, Abdusamed Shkodra, i cili ka bërë të ditur se ekipet zjarrfikëse janë nisur drejt vendit të ngjarjes. “Jemi duke shkuar në vendin e ngjarjes. Ende nuk kemi informacione të konfirmuara për natyrën e zjarrit”, ka deklaruar Shkodra për Sinjalin. Për momentin nuk dihet nëse ka persona të lënduar apo dëme materiale.
Gazeta Sinjali do t’ju mbajë të informuar me të gjitha zhvillimet e reja. Sinjali – aty ku e vërteta flet para lajmit!