Policia e Tiranës ka vijuar kontrollet intensive në terren në kuadër të masave për parandalimin e paligjshmërive dhe rritjen e sigurisë, duke zhvilluar aksione në Tiranë, Fushë-Krujë, Bubq dhe Nikël.
Sipas njoftimit zyrtar, gjatë kontrolleve të kryera nga Forca e Posaçme Operacionale, Forca e Posaçme “Shqiponja” dhe shërbimet e Policisë Rrugore, janë kontrolluar 87 automjete dhe janë verifikuar 118 qytetarë. Si rezultat i aksionit, janë arrestuar në flagrancë dy persona.
Njëri prej tyre u kap me një sasi të dyshuar kokaine, ndërsa personi tjetër mbante një shufër metalike, e cila u sekuestrua në cilësinë e provës materiale. Policia ka shoqëruar gjithashtu një person që dyshohet se kishte shkelur masën e sigurisë “Arrest në shtëpi”, ndërsa automjeti luksoz që ai përdorte është sekuestruar.
Gjatë kontrolleve janë konstatuar dhe hequr 34 xhama të errësuar në kundërshtim me Kodin Rrugor, ndërsa drejtuesit e automjeteve janë ndëshkuar me masa administrative. Për verifikime të mëtejshme janë shoqëruar 12 automjete dhe 16 persona. Sinjali – aty ku e vërteta flet para lajmit!