Cristian Romero pritet të largohet nga Tottenham Hotspur dhe të rikthehet në Serie A, pasi klubi londinez raportohet se ka arritur marrëveshje me Interin për transferimin e mbrojtësit argjentinas.
Sipas raportimeve të fundit, dy klubet kanë gjetur gjuhën e përbashkët për një marrëveshje me vlerë rreth 34 milionë funte, një shifër që konsiderohet e ulët për një futbollist të profilit të Romero-s, i cili është vetëm 28-vjeçar.
Romero, i cili u transferua te Tottenham nga Atalanta fillimisht në formë huazimi dhe më pas u ble përfundimisht në vitin 2022 për rreth 43 milionë funte, ka qenë një nga shtyllat kryesore të mbrojtjes së skuadrës angleze.
Mbrojtësi argjentinas, kampion bote me Argjentinën, ka zhvilluar më shumë se 150 paraqitje me fanellën e Tottenhamit, por pas një sezoni pa trofe dhe një përfundimi zhgënjyes në Premier League, ai është pranë largimit nga Londra.
Raportohet se dëshira e madhe e Romero-s për t’u larguar ka ndikuar në pozicionin negociues të Tottenhamit, i cili është detyruar të pranojë një ofertë më të ulët për të arritur marrëveshjen. Tottenham tashmë ka nisur përgatitjet për sezonin e ri pas Romero-s, duke afruar këtë verë mbrojtës si Andrew Robertson dhe Marcos Senesi, të dy si transferime pa kosto.
Ndërkohë, Interi pritet ta mirëpresë Romero-n si një përforcim të rëndësishëm për repartin defensiv, ndërsa marrëveshja zyrtare pritet të finalizohet në ditët e ardhshme.