Presidenti Donald Trump mbajti një fjalim të gjatë të premten në mbrëmje në darkën e riprogramuar të Shoqatës së “Korrespondentëve të Shtëpisë së Bardhë”, event që u shty pas të shtënave që e ndërprenë ceremoninë e prillit. Ngjarja u zhvillua në hotelin Waldorf Astoria në Uashington, nën masa të rrepta sigurie. Trump e nisi fjalimin duke rikujtuar incidentin e prillit.
“Siç thashë tre muaj më parë, shfaqja duhet të vazhdojë,” deklaroi ai. “Sot kthehemi së bashku për t’i përgjigjur këtij sulmi të neveritshëm me vendosmëri të pathyeshme,” theksoi presidenti, duke shtuar se në Amerikë “nuk dorëzohemi ndaj dhunës politike”. Fjalimi, që zgjati mbi një orë, u karakterizua nga ndryshime toni.
Trump shprehu respekt për disa gazetarë të pranishëm, duke thënë se ka “respekt të madh për njerëzit në këtë dhomë”, edhe pse herë pas here ndjen se nuk trajtohet drejt.
Megjithatë, ai nuk hezitoi të sulmonte me emër dhe me nofka ofenduese disa nga kundërshtarët e tij politikë, përfshirë ish-presidentin Joe Biden, liderin e senatit demokrat Chuck Schumer, guvernatorin e Kalifornisë Gavin Newsom, deputeten Ilhan Omar, senatoret Elizabeth Warren dhe Adam Schiff.
Në fund të fjalimit, Trump nxori një kapele të kuqe me mbishkrimin “Trump 2028” dhe shakoi se do të kandidonte përsëri për president, edhe pse Kushtetuta e ndalon një mandat të tretë. Ai falënderoi të pranishmit për guximin që kishin treguar duke ardhur, pasi disa njerëz kishin frikë të merrnin pjesë pas incidentit të prillit.
Një nga momentet më të vëzhguara të mbrëmjes ishte paraqitja e korrespondentit legjendar të CNN-së, Wolf Blitzer, i cili dorëzoi disa çmime kryesore të gazetarisë. Blitzer, një figurë e njohur prej dekadash në mbulimin e politikës amerikane, i dha çmimin “Katharine Graham” ekipit të “Wall Street Journal” për hetimin mbi lidhjet e Trump me Jeffrey Epstein.
Gjatë fjalës së tij, ai theksoi se pas botimit të artikullit presidenti ngriti një padi prej 20 miliardë dollarësh dhe zbuloi adresën e shtëpisë së një prej gazetarëve, duke detyruar familjen e saj të zhvendosej. “Gazeta u hoq nga Air Force One, por reporterët vazhduan të botonin histori zbuluese,” tha Blitzer.
Trump qeshi dhe ngriti duart në shenjë ironie, pastaj shtrëngoi duart me çdo anëtar të ekipit të shpërblyer. Blitzer dorëzoi gjithashtu çmime të tjera, përfshirë atë për kolegen e tij Kaitlan Collins, duke theksuar thellësinë e mbulimit të saj nga Shtëpia e Bardhë. Darka e prillit u ndërpre kur Cole Allen hapi zjarr brenda hotelit Washington Hilton.
Oficeri i Shërbimit Sekret Victor Gonzales u godit nga plumbat në jelekun mbrojtës, por vazhdoi të reagojë. Trump e përshëndeti Gonzalesin gjatë darkës, ndërsa “Shoqata e Korrespondentëve” i dha atij dhe stafit të hotelit Hilton një çmim special. Ngjarja e së premtes u zhvillua në një ambient më të vogël, me rreth 700 pjesëmarrës dhe masa të forcuara sigurie.
Argëtuesi i mbrëmjes ishte mentalisti Oz Pearlman. Zv.presidenti JD Vance nuk mori pjesë për shkak të lindjes së fëmijës së katërt.