Në ditën e tretë, riaktivizohet zjarri mes Lekasit dhe Voskopojës, përfshihet pylli me pisha Zjarri mes fshatit Lekas dhe Voskopojës është riaktivizuar në ditën e tretë të tij, duke marrë përmasa të mëdha dhe duke u përhapur në zonën pyjore me pisha.
Edhe pse autoritetet njoftuan më herët se vatrat e zjarrit ishin neutralizuar plotësisht, flakët janë rikthyer dhe situata në terren mbetet shqetësuese. Zjarri ka përfshirë një sipërfaqe të konsiderueshme, ndërsa era po favorizon përhapjen e tij.
Aktualisht, po pritet ndërhyrja e forcave të ushtrisë për t’iu bashkuar operacionit të shuarjes së flakëve, ndërsa ekipet e emergjencës vijojnë punën në terren për izolimin e vatrave aktive. Zjarri, që prej tre ditësh po rrezikon pasurinë pyjore të zonës, ka hyrë në pyllin me pisha, duke shtuar vështirësitë për vënien e tij nën kontroll.
Autoritetet pritet të japin një bilanc më të detajuar mbi sipërfaqen e djegur dhe dëmet e shkaktuara.