FIFA ka konfirmuar zyrtarisht fondin e shpërblimeve financiare për ekipet pjesëmarrëse në Kupën e Botës 2026, me kampionen Spanjën që do të arkëtojë shumën më të madhe. Pas triumfit në finalen e Botërorit, kombëtarja spanjolle do të përfitojë 38.1 milionë funte, ndërsa finalistja Argjentina do të shpërblehet me 25.4 milionë funte.
Edhe kombëtaret që përfunduan në podium do të marrin shuma të konsiderueshme. Anglia, e cila e mbylli turneun në vendin e tretë, do të përfitojë 22.4 milionë funte, ndërsa Franca, që u rendit e katërta, do të marrë 20.9 milionë funte. FIFA ka bërë të ditur se shpërblimet janë të garantuara për të gjitha ekipet pjesëmarrëse, varësisht nga faza ku eliminohen.
Kombëtaret që arritën në çerekfinale do të përfitojnë nga 14.9 milionë funte secila, ato që u eliminuan në fazën e 1/8 së finales do të marrin 12 milionë funte, ndërsa skuadrat që u ndalën në fazën e 1/16 së finales do të shpërblehen me 9 milionë funte.
Edhe ekipet që nuk arritën të kalojnë fazën e grupeve nuk do të mbeten pa përfitime financiare, pasi secila prej tyre do të marrë 7.5 milionë funte. Këto shpërblime konfirmojnë edhe një herë se Kupa e Botës mbetet turneu më fitimprurës në futbollin ndërkombëtar, duke u garantuar federatave pjesëmarrëse të ardhura të konsiderueshme për suksesin e tyre në kompeticion.