Gëzimi për lindjen e djalit i kushtoi shtrenjtë një 39-vjeçari nga Prishtina, i cili përfundoi në Polici pasi u kap duke shtënë me armë zjarri gjatë një ahengu familjar, raporton Sinjali. Sinjali mëson ekskluzivisht se i dyshuari është Florim Alija rreth 39 vjeç.
Sipas burimeve të Sinjalit, rasti ka ndodhur mbrëmjen e 19 korrikut, rreth orës , në rrugën “ Gryka e Llapushnikut” në Prishtinë, ku Policia u alarmua për të shtëna me armë zjarri. Njësia reaguese e Stacionit Policor “ Veriu ” ka dalë menjëherë në vendin e ngjarjes dhe, në një shtëpi ku po zhvillohej një aheng familjar, ka hasur Florim Alijën duke shtënë me armë zjarri.
Policia ka ndërhyrë menjëherë, ia ka marrë armën e zjarrit dhe e ka shoqëruar të dyshuarin në stacion policor. Në vendin e ngjarjes kanë dalë edhe hetuesit dhe krimteknika, të cilët kanë kryer ekzaminimin dhe kanë sekuestruar armën e zjarrit si dhe nëntë gëzhoja, ndërsa me urdhër të Prokurorit është kryer edhe bastisja e shtëpisë, por nuk janë gjetur prova të tjera.
Gjatë intervistimit, në prani të avokatit mbrojtës, Florim Alija ka deklaruar se kishte shtënë me armë për të festuar lindjen e djalit të tij. Me vendim të Prokurorit të Shtetit, ndaj tij është iniciuar procedurë penale për veprat “Armëmbajtje pa leje ” dhe “ Përdorim i armës”, ndërsa pas përfundimit të procedurave policore është liruar në procedurë të rregullt. Rasti mbetet nën hetim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata. Sinjali – aty ku e vërteta flet para lajmit!