Kur një fëmijë solli këpucët e tij të bardha të futbollit në grumbullimin e Shteteve të Bashkuara në Botërorin e Gjermanisë 2006, arriti të marrë edhe një autograf nga Landon Donovan, atëherë ylli i kombëtares, disa fotografi dhe një shaka për erën e këpucëve.
Weston McKennie, djali i një ushtaraku amerikan të vendosur në Gjermani, ishte vetëm shtatë vjeç, por tashmë i fiksuar pas futbollit dhe ajo ishte hyrja e tij e parë në Botëror, shkruan media italiane “La Gazzetta dello Sport”.. Njëzet vjet më vonë, autografet i kërkohen atij.
Sot ai është një nga lojtarët kryesorë të Shtetet e Bashkuara të Amerikës, dhe në prag të ndeshjes me Australinë ndaloi për t’i firmosur një kartë Pokemon një tifoz të vogël. Videoja u bë virale, me emocione dhe reagime të shumta në rrjete sociale, duke rritur edhe më shumë popullaritetin e tij.
SHBA-ja ka kaluar në fazën e 1/16-ave pas fitores 2:0 ndaj Australisë, duke regjistruar dy fitore radhazi në Botëror për herë të parë pas 92 vitesh. Ylli kryesor i skuadrës është Christian Pulisic, por ai mungoi në atë ndeshje për shkak dëmtimi. Në këtë situatë, McKennie ka marrë edhe më shumë përgjegjësi, ashtu si ndodh shpesh edhe te Juventus.
Sipas analizave të ndeshjes, ai ishte lojtari që krijoi më shumë raste për gol dhe dha më shumë pasime në zonën e fundit (18). Trajneri Luciano Spalletti e ka përshkruar si “lojtar perfekt për trajnerin: bën gjithçka që i kërkohet”. Ai ka kurajo, provon gjëra që ndonjëherë nuk janë në stilin e tij, por shpesh ia del.
McKennie është vlerësuar edhe nga Mauricio Pochettino, ndërsa publiku amerikan e ka pritur shumë mirë. Kur u zëvendësua në fund të ndeshjes, stadiumi në Seattle e duartrokiti gjatë, si shenjë mirënjohjeje për kontributin e tij. Në fushë ai ka liri të madhe loje, depërton drejt zonës dhe ndihmon në thyerjen e linjave kundërshtare me lëvizjet e tij.
Edhe pse energjia e skuadrës është e madhe, kërkohet edhe vendimi i duhur në momentin e duhur, dhe McKennie shpesh e provon këtë rol krijues. Ai nuk është gjithmonë ylli kryesor, por është një nga lojtarët më të rëndësishëm të kësaj gjenerate që po rrit ambiciet e SHBA-së në Botëror.