Shpërthen kriza në kampin e Koresë së Jugut, lojtarët bojkotojnë mediat pas sulmeve ndaj Son Heung-min!

Kombëtarja e Koresë së Jugut po përjeton një moment tensioni vetëm pak ditë përpara ndeshjes me Meksikën, për shkak të përplasjeve me përfaqësues të medias së vendit, të cilët kanë udhëtuar në Amerikën e Veriut për të mbuluar këtë eveniment. Stërvitja e kësaj të marte u zhvillua pa praninë e medias, siç parashikon rregullorja, duke qenë se po afrohet ndeshja me Meksikën, e planifikuar të luhet të enjten. Përplasjet me median koreane nisën pas transmetimit të drejtpërdrejtë të stërvitjes së parë të zhvilluar nga skuadra në tokën meksikane, gjatë së cilës u dëgjuan gazetarë koreano-jugorë duke kritikuar kapitenin Son Heung-min për faktin se nuk e kishte kryer plotësisht shërbimin ushtarak, siç e kërkon ligji i vendit. “Vrapon sikur të ishte në shërbim ushtarak dhe as nuk e përfundoi atë”, dëgjohen të kenë thënë gazetarët në video, duke iu referuar trajtimit të veçantë që Son mori në këtë aspekt pasi Koreja e Jugut fitoi medaljen e artë në Lojërat Aziatike të vitit 2018. Pjesëtarët e skuadrës koreano-jugore u shfaqën të pakënaqur dhe zhvilluan një mbledhje ekskluzive me përfaqësuesit e medias së vendit të tyre. Paralelisht, futbollistët u solidarizuan me Sonin dhe refuzuan të merrnin pjesë në konferencat për shtyp që kombëtarja kishte planifikuar përpara stërvitjes. Jo vetëm kaq, por stafi teknik vendosi të anulonte edhe të gjitha intervistat individuale të lojtarëve me disa media, ndonëse për to ishte rënë dakord prej kohësh. Kjo shkaktoi pakënaqësi te gazetarët koreanë, të cilët kritikuan anëtarët e Federatës, duke i tensionuar edhe më tej marrëdhëniet. Si pasojë, kombëtarja koreane kërkoi që përgjegjësit të kërkonin ndjesë; në të kundërt, intervistat e planifikuara nuk do të zhvilloheshin. Të hënën, Federata Koreano-Jugore e Futbollit publikoi një komunikatë ku shprehte pakënaqësinë për komentet e papërshtatshme që kishin shkaktuar shqetësim dhe zhgënjim në skuadër. Në të njëjtën kohë, ajo u kërkoi gazetarëve të tregonin më shumë konsideratë dhe të silleshin me përgjegjësi ndaj kombëtares dhe futbollistëve, në mënyrë që situata të tilla të mos përsëriteshin. Po ashtu, Federata bëri thirrje për unitet dhe mbështetje ndaj kombëtares, e cila po merr pjesë në Botërorin e saj të 11-të dhe ndodhet përballë një prej sfidave më të vështira të fazës së grupeve. Megjithatë, komunikata u fshi nga rrjetet sociale të Federatës vetëm pak orë më vonë, pikërisht në momentin kur Son zhvilloi një takim me gazetarët. Gjatë këtij takimi, këta të fundit i kërkuan falje sulmuesit, edhe pse, sipas dëshmitarëve, lojtari nuk e bëri të qartë nëse do të hiqej apo jo vetoja ndaj medias koreano-jugore. Këtë të mërkurë, trajneri Hong Myung-bo dhe një futbollist i kombëtares do të mbajnë një konferencë për shtyp për median ndërkombëtare, si pjesë e aktiviteteve të programuara nga FIFA përpara ndeshjes.